O bipartito no Valadouro. Antes festas que emprego

José Manuel Lamela.- O Partido Popular do Valadouro dixo NON aos orzamentos municipais que o novo goberno local propuxo na última sesión plenaria. Con todo, as contas foron aprobadas inicialmente polos concelleiros do PSOE, Udival e BNG, e o rexeitamento do grupo político máis votado: o popular.

Nós defendemos que para O Valadouro é positivo que o Concello conte con este instrumento de planificación económica e contable. Aceptamos incluso gran parte dese orzamento xa que as contas só varían en menos dun 2% en relación co proxecto que presentamos ata en tres ocasións, cando eramos nós os que tíñamos a responsabilidade de goberno.

Pero precisamente no pouco que varía, apreciamos unha filosofía que non podemos compartir. Pois as forzas do bipartito, en compañía do seu curioso aliado o BNG, veñen a dicirnos algo así como “antes festas que emprego” e a consolidar o nomeamento a dedo dun coordinador-asesor.

Foi no último pleno cando non tiveron problemas en incrementar en máis dun 22% a partida dedicada a festexos populares, mentres rexeitan a emenda do PP na que pedíamos a inclusión no orzamento dun plan de emprego. O cando crearon –co conseguinte soldo- a figura dese asesor nomeado a dedo para coordinar as concellarías de Udival. Miran polo seu pero, en cambio, votan NON ás propostas do PP destinadas a xerar novas oportunidades de traballo para os nosos veciños, en especial para todos aqueles que pola súa idade ou formación teñen menos oportunidades de inserción no mercado laboral e precisan do apoio do seu concello.

Os veciños do Valadouro teñen dereito a saber que o seu novo alcalde, levaba dous anos boicoteando unhas contas por puro sectarismo, xa que estaba de acordo co destino de 98 de cada 100 euros. Os veciños do Valadouro teñen dereito a saber que as prioridades do bipartito son outras. Quizá aqueles compromisos inconfesables que aparecen no pacto asinado ante notario e que a día de hoxe seguen ocultando a veciños e medios de comunicación. Quizá, as súas prioridades sexan eso, un asesor, máis festas, e menos emprego. Mal empezamos.

José Manuel Lamela, exalcalde e portavoz do Grupo Popular do Valadouro