Arias subliña que “a provincia de Lugo é a que máis incrementou a poboación con acceso a Internet” grazas ao Plan de Banda Larga da Xunta

Lugo, 6 de setembro de 2013.- O Plan de Banda Larga da Xunta posibilitou que, hoxe, arredor de 326.000 habitantes da provincia de Lugo dispoñan de acceso á rede. Dende o inicio do Plan, este facilitou xa que máis de 136.000 habitantes da provincia de Lugo que carecían de cobertura poidan acceder á rede. Así o indicou hoxe en rolda de prensa a delegada territorial da Xunta en Lugo, Raquel Arias.

A máxima representante do Executivo galego en Lugo significou que na provincia hai 9.929 núcleos de poboación, dos que xa se cubriron, grazas ao Plan de Banda Larga da Xunta, máis de 8.400 (un 84,7%)*.

Así, subliñou Arias, “a porcentaxe de poboación con cobertura pasou do 54% en 2010 a preto do 93% a día de hoxe, rexistrando o incremento máis importante de todas as provincias galegas”. Deste xeito, “o plan avanza na redución da fenda dixital entre as provincias do interior e as do eixo atlántico, que pasou dun 20% en 2010 a un 2% actualmente”.

O plan, que se puxo en marcha en 2010, é un plan a catro anos que se desenvolve de xeito progresivo nos núcleos da comunidade galega sen cobertura, nos que  cuestións como a dispersión poboacional ou a orografía dificultan os despregamentos. De aí que, nalgúns concellos haxa zonas nas que xa se completaron as actuacións e noutras nas que se completarán ao longo deste ano e con cobertura vía satélite durante 2014.

O plan está a impulsar o despregamentos de redes fixas e sen fíos “e conta cun programa de axudas para a conexión vía satélite para aquelas zonas nas que non é posible facilitar o acceso a internet  con ningunha outra tecnoloxía”. Estas medidas están destinadas á dotar de cobertura a todos os galegos. Pero ademais o plan ten outro obxectivo que é impulsar a implantación na comunidade.de redes de Nova Xeración (NGAs) con ata 100 Mbps de velocidade.

Conexión vía satélite para as zonas máis illadas da Comunidade

Para as zonas máis illadas da Comunidade, nas que non é posible o acceso a internet mediante outra tecnoloxía o  plan contra cun programa de axudas para a conexión vía satélite.  “Está aberta a segunda convocatoria de axudas para contratar Internet vía satélite por parte de fogares e pemes das zonas con máis dificultades de cobertura de toda a Comunidade, que poderán solicitar estas achegas ata o próximo 30 de setembro”, enfatizou Arias.

O programa conta este ano “cun investimento de 359.000 euros e permitirá achegar a banda larga a arredor de 2.000 fogares e pemes que non dispoñan de acceso á banda larga de cando menos 2Mbps, mediante outra tecnoloxía”.

“O pasado ano se beneficiaron destas axudas máis de 260 familias e pemes da provincia de Lugo”, explicou Arias, máis que ningunha outra adminitración oficial na provincia de Lugo. As demandas de axudas procederon de toda a provincia, se ben concentráronse solicitudes de concellos das comarcas de Lugo, a Terra Chá e Sarria.

O investimento total das axudas na comunidade é de 1.077.000 euros ata 2014 para dotar de cobertura a máis de 5.400 fogares e empresas das zonas galegas máis illadas, dispersas e de orografía complicada, onde o acceso a Internet só é posible vía satélite.

Beneficiarios e importe das axudas

Os beneficiarios das axudas serán fogares e empresas con enderezo en Galicia que non dispoñan de acceso á Rede, de cando menos 2Mbps, mediante outra tecnoloxía. O programa establece unha única subvención por enderezo destinada a sufragar os gastos de instalación así como o custo do equipamento do interior da vivenda ou empresa preciso para distribuír a sinal de banda larga, cunha contía máxima de 150 euros e condicionado á contratación dun servizo de cando menos 2Mbps cun período de permanencia de doce meses.

As entidades colaboradoras ofrecen servizos de internet vía satélite de ata 20Mbps de velocidade de baixada ao abeiro desta convocatoria. A alta de liña e o importe da tarifa do primeiro mes será asumido pola entidade colaboradora e, por tanto, gratuíto para os beneficiarios.

As axudas tramitaranse a través de 4 empresas provedoras do servizo de Internet vía satélite acreditadas como entidades colaboradoras pola Xunta, Duo Telecom, Eurona, Quantis e Terrachá Technoloy. Poderanse sumar novas entidades colaboradoras ata que remate a vixencia das bases (2013-2014).

Redes de 100 Mbps

Ademais de dotar de acceso a internet a todos os galegos, outro dos obxectivos do Plan é impulsar a implantación de redes NGAs, que permiten velocidades de ata 100Mbps. Na provincia de Lugo preto de 151.000 persoas da provincia xa teñen acceso a estas redes.

Cómpre destacar que Galicia é das primeiras comunidades da Unión Europea en incentivar a extensión deste tipo de redes. O Plan permitiu que, ata finais de 2012, sexan xa máis de 1,1 millón os galegos que teñen acceso a estas redes máis punteiras.

Punto de partida e orzamento

Tras un exhaustivo estudio sobre a cobertura de banda larga na Comunidade a Xunta detecta que en 2010, só o 71% da poboación tiña cobertura de internet e que a banda larga non chegaba a todos centros de servizos públicos nin a todos os polígonos industriais. Para reverter esta situación promoveuse o Plan de Banda Larga, con seis actuacións, todas en marcha hoxe, e que conta cunha dotación pública-privada de máis de 237 millóns de euros.

Para consultar os avances do plan, cidadáns e empresas teñen a súa disposición a aplicación rede http://cobertura-pdbl.xunta.es, na que poden coñecer os avances do Plan no seu núcleo de poboación e tamén se poden informar na oficina de banda larga oficina.bandalarga@xunta.es e no teléfono 981.957.868.