O Partido Popular de Viveiro esixe a retirada inmediata das gradas da Praza Maior

Desde o Partido Popular de Viveiro queremos manifestar a nosa preocupación pola perigosidade que supón o feito de que se manteñan na Praza Maior as gradas utilizadas para diversos actos das festas de agosto.

O pasado 4 de setembro solicitamos a retirada das gradas e o palco da Praza Maior, apresurándose a contestar o equipo de goberno que “ya se están retirando” e certamente se retirou o palco para deixar paso á Procesión Magna, que desgraciadamente non puido sair polas rúas da nosa cidade. Agora ben, tamén é certo que a día de hoxe o “se están retirando” dos socialistas se alonga xa un mes máis, circunstancia que acredita a desorganización e a desidia do actual goberno municipal.

Como dicíamos fai un mes, o manter as gradas na praza non beneficia a ninguén, máis ben ao contrario: trátase dun nicho de porquería, supón unha incomodidade para os veciños no seu acceso ás dependencias municipais, evita a entrada de luz natural a estas oficinas –co conseguinte incremento de gasto en luz eléctrica- e o que é máis importante é un verdadeiro perigo para os nenos que a diario utilizan a praza como zona de esparcemento.

Parece mentira que o alcalde, a alcaldesa en funcións ou o concelleiro de festas non sexan conscientes deste perigo, sobre todo, tendo en conta que non fai moito tempo unha menor sufriu un grave accidente por caída dende o alto das gradas. ninguén desexa que se repita a historia e se produza outro desgraciado accidente, pero non cabe dúbida que a mellor maneira de evitalo é facer desaparecer o perigo e calquera medianamente responsable retiraría xa as gradas da nosa Praza Maior.