O PP agradece que a Xunta concedese a Mondoñedo o financiamento para que o Concello contrate a tres peóns de obra

Mondoñedo, 28 de setembro de 2013- O Partido Popular de Mondoñedo agradece á Xunta de Galicia a subvención que vén de conceder ao Concello, para que o equipo de goberno local, integrado polo PSOE e o BNG e liderado por Orlando González, poda seleccionar e contratar a tres peóns de obra.

O PP local reitera a implicación da Xunta de Galicia co municipio e, en concreto, neste caso a colaboración da Consellería de Traballo e Benestar que vén de achegar o financiamento para a creación de tres postos de traballo, nun momento de gran demanda de emprego na localidade.

A Xunta de Galicia achega a dotación orzamentaria, mentres que o equipo de goberno municipal (no que o PP non forma parte) deseñou as bases que regulan este proceso para cubrir estes postos de traballo mediante o sistema de concurso. Polo tanto, Orlando González e os concelleiros do PSOE e do BNG serán os encargados de seleccionar e contratar aos traballadores.

Neste senso, O Partido Popular de Mondoñedo quere informar aos veciños desta convocatoria, e explica que os interesados poderán recoller os impresos nas instalacións do Concello, que deberán presentar cubertas antes do 4 de outubro de 2013.

Esta subvención que supera os 26.000 euros, realízase pola Xunta de Galicia ao amparo da resolución de data 16 de setembro de 2013 relativa aos programas de Cooperación entre a Consellería de Traballo e Benestar e as entidades locais.

Polo tanto, os populares vénse na obriga de agradecer unha vez máis a boa predisposición da Xunta de Galicia posta de manifesto en reiteradas ocasións, e máis cando leva implícita a achega económica para a creación de postos de traballo.