Un cento de emigrantes retornados da Mariña manifestáronse en Foz para esixir unha solución á problemática derivada da pensión que reciben da pensión do estranxeiro

A Mariña, 29 de outubro de 2013. Un cento de emigrantes retornados da comarca da Mariña manifestáronse na mañá deste martes fronte á oficina da Axencia Tributaria de Foz para demandar unha solución á problemática referente á pensión que veñen recibindo polo seu período laboral fóra do estado español. Esta concentración, coincidía con outras vinte celebradas en distintos puntos de Galiza. Na manifestación, á marxe dos emigrantes retornados, tamén participaron distintos representantes sindicais e políticos, como é o caso do secretario da unión local da CIG, e o voceiro municipal do BNG en Foz, Xan Carlos Basanta.

Este acto reivindicativo rematou coa lectura dun manifesto a cargo de Lionel Rexes, portavoz da plataforma de Emigrantes Retornados da Mariña, quen previamente entregara un escrito no rexistro da oficina de Facenda da localidade, no que o colectivo solicita un trato xusto e igualitario para os Emigrantes Retornados Pensionistas, e esixe a revogación dos expedientes xa iniciados e devolución do pagado, a anulación dos expedientes sancionadores, así como a modificación da LEI para garantir a igualdade de trato para os Emigrantes Retornados.

“Milleiros de galegos e galegas ficamos atónitos ao ler ou escoitar o proceso emprendido desde a Axencia Tributaria contra os emigrantes retornados, que percibimos parte da nosa pensión de países estranxeiros. En esencia, logo de anos e décadas de vir recibindo pensións desde os países nos que estivemos traballando, sen que esas rendas figurasen como ingresos a tributar, agora Facenda esíxenos o pagamento atrasado do imposto sobre a renda correspondente, incrementado con xuros de demora e máis sancións”, afirmou o voceiro do colectivo mariñán.

“A maioría destas persoas emigrantes – precisou Rexes- nunca tivemos advertencia desa obriga, e mesmo acudimos a elaborar en moitos casos as declaracións tributarias anuais ás dependencias da Axencia Tributaria, orientadas e asesoradas por persoas ao servizo desa administración tributaria”.

Segundo afirman desde a plataforma de Emigrantes Retornados da Mariña, “o calvario de milleiros de galeg@s empeza cando a Axencia Tributaria executa a decisión do Ministro nos primeiros meses deste ano 2013, e comezan a chegar cartas con multas e sancións, por todo o País. Sen ningún diálogo, sen previo aviso, sen información de ningún tipo, o Ministro de Facenda condéanos culpábeis de sermos defraudadores, obríganos a facer una declaración a cal nunca fixemos, de cinco anos para atrás: 2008/2012, e sanciónanos con multas e xuros de demora e con carácter retroactivo, de entre 3 e 20 mil euros e máis, e a pagar a totalidade nun prazo de dez días, no caso de non pagar, ordena embargo de bens e contas bancarias. Nós decimos que esta é unha estafa e un ataque brutal de acoso económico e moral a un dos colectivos máis débiles e maiores da sociedade, tod@s avós e avoas”.

Lionel Rexes explicou que “nas décadas dos anos: 50, 60, 70 milleiros de mozos e mozas galegos, forzados polas circunstancias, tivemos que emigrar a Europa e América, e fomos quen de enviar centos de miles de millóns de divisas para as arcas do estado español, e aínda hoxe, seguen a enviar cantidades moi importantes de diñeiro @s nos@s fill@s e net@s que desgraciadamente, xa están emigrados. E por se isto fora pouco, xa vell@s , xubilad@s e de volta na nosa terra cos cartos que seguen a chegar das nosas pensións, seguimos a xerar riqueza para o Estado Español. Somos moitos miles, ao redor de 250.000 persoas afectadas por esta gran estafa”.

“É inmoral que nos persigan e nos traten coma defraudadores, mentres que aos verdadeiros defraudadores e evasores fiscais, o Goberno Español aproba unha Lei para concederlle Amnistía Fiscal, e para os pensionistas emigrantes retornados non hai perdón, nin alternativa, nin amnistías. Nós non queremos amnistías de ningún tipo, porque non as necesitamos, nós somos traballadores, non somos defraudadores. Nós afirmamos, porque é verdade, que nos Consulados, nas Agregadurías Laborais Españolas, nas Asesorías e nas mesmas Axencias Tributarias, a información que se nos facilitaba era sempre a mesma, que as pensións dos países estranxeiros non había que declaralas”, concluíu o voceiro do colectivo comarcal.