Pombo reclama no Parlamento que a Xunta cumpra cos compromisos de atención sanitaria na Mariña

Santiago de Compostela, 13 de febreiro, 2014. O deputado do BNG, Cosme Pombo formulou este xoves unha pregunta, na Comisión de Sanidade, sobre o “incumprimento” das obrigas da Xunta en materia de atención sanitaria pública á zona da Mariña Luguesa.

Na actualidade, afirmou moitos pacientes afectados de cancro deben desprazarse dende A Mariña ata Lugo ou Coruña para recibir o tratamento de quimioterapia e esta circunstancia para nós, resulta un “manifesto deterioro” da sanidade pública e un recorte do dereito dos cidadáns aos servizos sanitarios.

Por outra parte, Cosme Pombo denunciou o incumprimento das promesas do Presidente da Xunta e responsábel do Sergas, García Quintás quén afirmou que o servizo de oncoloxía estaría listo para o ano 2013.

O director xeral de Asistencia sanitaria negou as afirmacións do deputado do BNG acusándoo de “catastrofista” e asegurando que Áreas de Monforte e A Mariña reduciron as listas de espera, o número de profesionais nos centros sanitarios foi incrementado e a Xunta avanza na prestación da atención oncolóxica.

Na quenda de réplica o nacionalista respondeu que a única reposición que fixo a Xunta foi a de “profesionais espirituais” e a cidadanía reclama “profesionais sanitarios”.

O deputado do BNG tamén criticou que o responsábel do Sergas, limitarase a dicir que “a Xunta ten a vontade de poñer a disposición dos doentes tratamentos de quimioterapia”. Os cidadáns, recriminou Pombo “non queren máis promesas valeiras, queren feitos e medidas concretas despois do acordo parlamentar do mes de outubro para evitar os desprazamentos a Coruña ou Lugo dende A Mariña dos doentes que precisan tratamentos oncolóxicos.”

O nacionalista rematou a súa intervención lembrando que o BNG denunciou no seu momento, que a Xerencia integrada de Lugo “eliminaría os investimentos prometidos, tanto nos centros de saúde como no propio Hospital da Costa e incrementaría o desvío de pacientes a centros privados”. Vostedes, concluíu, “non teñen sensibilidade nin cumpren coa súa palabra”