As obras de reforma da Praza de Abastos de Ribadeo complementaranse cun ciclo de formación dirixido aos praceiros

Ribadeo, 19 de setembro de 2014. En breve darán comezo as obras que se realizarán na praza de abastos de Ribadeo. Contan cun investimento de cerca de 64.000 euros. Están subvencionadas pola Xunta e consistirán no pintado exterior do edificio e no arranxo de vigas e de desconchados no interior. O proceso de adxudicación das mesmas estase a ultimar, segundo explicou o alcalde, Fernando Suárez, esta mañá. O rexedor tamén aludiu ás accións formativas que se levarán adiante para os praceiros e para potenciar o consumo de produtos locais.

Suárez Barcia afirmou que “nestes días estamos a ultimar unha serie de actuacións, tanto no tipo de estrutura deste edificio municipal, como tamén nas accións formativas para os comerciantes que desenvolven a súa actividade aquí, na praza de abastos de Ribadeo. Como sabemos, o noso municipio está a ser visitado por moita xente de aquí e de fora. Somos conscientes de que os invernos son duros para todos e queremos poñer o noso graíño de area para poñer en valor o que temos. Por iso, queremos seguir animando á xente a que consuma local e compre produtos de calidade coma os que aquí se venden, tanto carne, coma verdura, coma froita ou coma peixe”.

O alcalde ribadense engadiu que “por iso, aproveitando unha axuda autonómica imos facer unhas obras na praza de abastos que comezarán a realizarse en moi poucos días. Estamos a ultimar a adxudicación desta obra que consistirá nun pintado do perímetro exterior do edificio e nun amaño de parte da estrutura de vigas e danos nas paredes, así coma dalgunhas outras melloras nas que estamos a traballar. Pero ao mesmo tempo, queremos ofrecer tamén unha formación para os propios tendeiros, unhas cápsulas formativas como lles chamamos, que sirvan para mellorar a atención ao cliente e para fidelizalo. O que se trata é de demostrar que a praza non é soamente un espazo para vir os días de mercado, senón un lugar que ofrece os mellores servizos durante tódolos días da semana e durante case todos os días do ano”.

O rexedor defendeu que “dende o Concello queremos avogar por novas formas de comercialización, de promoción e de captación de novos clientes, que penso que é o maior reto que ten un mercado de abastos. Que non só sexa o cliente tradicional o que acuda a el, senón que se amplíe e se difunda a súa actividade a moita máis xente. Polo tanto, queremos facer accións formativas neste ámbito e para iso unha persoa experta na materia vai a asesorar individualmente a todos e cada un dos establecementos que están aquí para suxerirlles melloras de presentación e de traballo que poidan facer. Finalmente, tamén se vai a desenvolver unha campaña cooperativa, tanto on-line como off-line, sobre os valores da praza, a importancia de consumir local e outras liñas de actuación que signifiquen a difusión maioritaria deste espazo público”.