Para a CIG, o PP recorre ao insulto ante a falta de argumentos que sosteñan a súa postura a favor de suprimir a área sanitaria da Mariña

Burela a 10 de outubro de 2017.. Desde a CIG, que participaron na manifestación do pasado xoves en Burela e este domingo en Monforte, parabenizan á Plataforma na Defensa da Sanidade Pública polo traballo divulgativo, de información e mobilización realizado e agradecen a toda a cidadanía -de todos os concellos, idades e ideoloxías- que se mobilizou e a moita outra que, por diversos motivos non puido estar, que baixo a bandeira común de defensa da sanidade pública na comarca da Mariña están facéndolle fronte á política sanitaria do PP.

Quen insulta pon de manifesto que carece de argumentos.

“Nunha desesperada fuxida cara adiante, o deputado popular Daniel Veiga, non dubidou en cualificar hai uns días ás persoas que saíron á rúa como suxeita pancartas”, explican dende o sindicato nacionalista.

CIG Saúde A Mariña tacha de irresponsable a actitude de Daniel Vega e e exíxenlle desculpas inmediatas. “Sabemos que el se debe ao PP antes que ás veciñas e aos veciños da Mariña. Vale que prefira manter o seu posto ao prezo que sexa. Pero o que non imos permitir é que lle falte ao respecto así a toda unha comarca que, pacificamente, amosou na rúa o seu rexeitamento aos plans sanitarios do PP. O Señor Vega non remata de entender que a cidadanía saíu libremente á rúa xa que está a sufrir en primeira persoa os recortes sanitarios, as listas de espera e o aumento das derivacións a Lugo”

“Cando o PP para defender as súas formulacións tes que recorrer a elevar o ton por encima do que é politicamente recomendable, o único que mostra é falta de argumentos para defender as supostas melloras que suporía a desaparición da nosa área sanitaria”, afirman.

Supresión da Área Sanitaria.
Dende CIG Saúde esixen unha vez máis ao PP a retirada do anteproxecto de reforma da Lei de Saúde e demandan unha área de xestión integrada para A Mariña con plena capacidade de xestión en asistencia primaria e especializada e sobre os seus recursos humanos, económicos, infraestruturas e prestación de servizos da área sanitaria.
“A CIG continuará a participar nas mobilizacións dos mércores diante do Hospital da Costa e Centros de Saúde para manter a Area Sanitaria e defender unha sanidade digna e de proximidade”, conclúen.