Ribadeo, 15 de febreiro de 2018. A secretaria xeral de Igualdade da Xunta de Galicia, Susana López Abella, mantivo unha xuntanza en Ribadeo con representantes das asociacións locais de mulleres rurais e de amas de casa para falar das axudas da administración autonómica para estes colectivos, entre outros asuntos. Na reunión participaron tamén o deputado autonómico ribadense Daniel Vega e os concelleiros populares Jesús López Penabad, Juan Estévez e Rosina Tosar.
O presidente do Partido Popular López Penabad explicou: “estivemos acompañados de Susana López Abella, secretaria Xeral de Igualdade da Xunta de Galicia, e reunímonos con representantes de dúas asociacións: coa presidenta de Amas de Casa de Ribadeo e con tres directivas de Mulleres Rurais de Ribadeo. Seguimos na liña de xuntarnos e de escoitar a todos os colectivos que queiran para, sobre todo, saber as inquedanzas e reivindicacións que nos poidan transmitir. Neste caso foi con dous grupos de mulleres e o que pretendemos, tanto desde a administración autonómica como nosoutros localmente, é poñer en valor este tipo de asociacións que nos parecen moi importantes. Son colectivos de mulleres que, tanto no ámbito rural como no casco urbano de Ribadeo, están levando a cabo numerosas accións, tanto formativas como lúdicas. Parécenos moi interesante e a secretaria xeral Susana López Abella explicoulles o tipo de axudas que poden recibir, prazos e demais, á vez que escoitou as súas demandas; foi un encontro moi agradable”.
Jesús López Penabad subliña que “hai accesibilidade total tanto da administración como, por suposto, pola nosa parte, desde o nivel local, para estar en contacto con todos aqueles que queiran”.