Ribadeo, 26 de febreiro de 2018. Acisa Ribadeo convoca o VIII Concurso Fotográfico Día do Pai no que repartirá 500 euros en premios.
O eslogan elixido para a oitava edición do certame é O amor por un pai non ten prezo, pero si premio. Os traballos poderán presentarse a través do Facebook de Acisa Ribadeo dende o 2 ata o 18 de marzo.
As bases da convocatoria deste concurso recollen que poden participar todas as persoas maiores de idade que o desexen. Os traballos presentados non puideron ser publicados previamente en revistas, xornais, libros impresos ou sistemas on line. Tampouco puideron ser obxecto de ningún outro premio fotográfico. As devanditas bases pódense consultar no Facebook, na web de Acisa ou nas súas oficinas, sitas na Avenida de Galicia, nº 20-2ª planta.
As fotografías elixidas deben ter unha resolución de 2MPX (1920×1080) para a súa posterior impresión e exposición.
As imaxes débense subir á páxina do Facebook de Acisa, mediante a app que se instala para tal efecto e que xa está visible desde hoxe. Deberán indicar un título da obra e o seu correo electrónico e teléfono no lugar que se lle solicite. As persoas que se vexan na fotografía deberán ter un vínculo familiar, e entenderase que no caso de saír menores, a fotografía foi sacada coa autorización dos seus pais ou titores legais, que no caso de non ser os que saian na fotografía, deberán expresar o seu consentimento.
A aplicación no facebook comezará a funcionar dende as 00:00 horas do día 2 de marzo, e desde ese mesmo momento as fotos poderanse subir á plataforma. O prazo máximo de envío será as 23:59 horas do día 18 de marzo, que será cando a app do Facebook deixe de admitir imaxes, e nese mesmo momento saberase o gañador do premio do máis votado polos seguidores do Facebook de Acisa.
As fotografías terán un período de exposición pública no lugar creado a tal efecto na páxina do Facebook de ACISA Ribadeo, ao que se poderá acceder a través do seguinte enlace: https://www.facebook.com/acisaribadeo.
Durante ese prazo, que irá do 2 ao 18 de marzo, terá lugar a votación popular que dará lugar ao Premio do Público. Entre as 20 imaxes máis votadas na aplicación (agás a gañadora do Premio do Público), realizarase unha selección por parte do xurado das tres mellores, entre as que sairá o Premio do Xurado.
A publicación oficial realizarase o día 19 de marzo nas redes sociais e nos medios de comunicación. O xurado reunirase ese día e estará composto por representantes da asociación e fotógrafos profesionais asociad@s.
Haberá un único premio do público que estará dotada de 200 euros en vales de compra de Acisa, e no Premio do Xurado haberá un primeiro premio de 150 euros en vales de compra de Acisa, un segundo premio de 100 euros en vales de compra de Acisa, e un terceiro premio de 50 euros en vales de compra de Acisa. O galardoado deberá responder á chamada telefónica que se realizará dende as oficinas da Asociación de Comerciantes, Industriais, Servizos e Autónomos, tras o veredicto do xurado. Realizaranse tres intentos e no caso de non atender á chamada pasarase ao seguinte seleccionado.
As fotografías premiadas e as presentadas poderán ser utilizadas nas diferentes plataformas de difusión de Acisa, co único obxecto de promocionar a fase participativa do concurso.
Desde Acisa animan “á participación neste certame que chega xa a súa oitava edición” e lembran que “a directiva en funcións segue a traballar, como demostra a posta en marcha da campaña do día do pai”.
O proceso electoral para proceder á renovación da xunta directiva de Acisa ábrese o 1 de marzo e o día 12 dese mes ás sete da tarde deberán estar inscritas as candidaturas participantes neste proceso. As eleccións, que foron convocadas na pasada asemblea xeral ordinaria, terán lugar o 19 de marzo.
Acisa Ribadeo repartirá 500 euros en premios no VIII Concurso fotográfico do día do pai. Os traballos poderanse presentar do 2 ao 18 de marzo
Relacionado
No acto intervirán o autor e Xoan Ramón Fernández Pacios, cronista oficial de Foz. A actividade está organizada pola Federación de Librarías de Galicia en colaboración co Concello de Foz.
O alcalde, Dani Vega, fixo un balance moi positivo: “foi un concerto moi especial nun marco espectacular, como é a igrexa parroquial de Ribadeo, e no que o gaiteiro Carlos Núñez encandilou aos asistentes co seu repertorio. Todos os asistentes disfrutámolo moito”. Xunto a Carlos Núñez estiveron o rexedor e as concelleiras de Cultura, Turismo e Seguridade, Begoña Sanjurjo, Marta Saiz e Montse Seijo.
Durante case dúas horas desenvolveuse unha conversa aberta arredor do mundo do espírito e do contido da obra, nun encontro ao que asistiu un grupo numeroso de persoas dispostas non só a escoitar, senón tamén a dialogar e compartir reflexións. Tras a intervención inicial de Pepe Peinó como responsable do proxecto, tomou a palabra o escritor Lionel Rexes, quen achegou novas perspectivas antes de abrir o debate ao público. As opinións, argumentos e matices sobre relixión, espiritualidade, Deus e os valores que sustentan a convivencia foron enchendo o espazo nun ambiente participativo e respectuoso, no que as diferenzas quedaron en segundo plano fronte á forza do diálogo, a solidariedade e o afecto.
Foron os propios implicados quen contactaron co 112 Galicia pasada a medianoite deste domingo. O vehículo no que viaxaban saíuse da vía na LU-132, en Cabarcos, Barreiros. A posición na que quedou o coche, inclinado sobre un terraplén, complicou o acceso dos profesionais de Urxencias Sanitarias de Galicia-061, por iso, os xestores do Centro Integrado de Artención ás Emerxencias de Galicia avisaron aos Bombeiros de Barreiros. Finalmente, só tiveron que rescatar a un dos dous ocupantes, o copiloto, e, para iso, tiveron que cortar os asentos. Do mesmo xeito, o equipo médico só trasladou a unha persoa.
A iniciativa xurdiu co obxectivo de xuntar o alumnado que coincidira na EGB, pero axiña se ampliou a todas aquelas persoas que compartiron pupitres e amizades tamén no instituto.
O público, totalmente entregado de principio a fin, amosouno cos intensos e prolongados aplausos que acompañaron toda a actuación. Ao remate, os asistentes expresaron o seu desexo de poder gozar no futuro de novos concertos do artista, que sen dúbida volverán entusiasmar ao público.
Villares subliñou o éxito de convocatoria do evento, que reúne cada ano a numerosos participantes e afeccionados en Ribadeo, “aproveitando o atractivo da ría e do seu porto deportivo para atraer visitantes e complementar co deporte a súa ampla oferta de natureza, patrimonio e gastronomía”. A presente edición estivo dedicada á figura de Leopoldo Calvo-Sotelo, con motivo do centenario do nacemento do que fora presidente do Goberno e alcalde honorario do municipio. Ademais das regatas de vela en distintas categorías, celebráronse bautizos de buceo, charlas ou un concurso de pesca, entre outras actividades.
