Foz, 22 de febreiro de 2018. O Concello de Foz acadou un acordo para a compra dunha finca co obxectivo de ampliar o cruce da rúa Fonte da Cruz coa Avenida de Asturias. O alcalde, Javier Jorge Castiñeira, subliña que servirá para darlle maior seguridade e mobilidade a esa zona da vila.
Javier Castiñeira quere “informar a todos os veciños do concello de Foz que o Concello e a persoa propietaria chegamos a un acordo de compra-venda dunha finca moi importante para mellorar a mobilidade dentro do casco urbano e tendo en conta que, dentro de poucas semanas, comezaremos a obra da rúa Álvaro Cunqueiro”.
O rexedor explica que “a finca fai esquina entre a rúa Fonte da Cruz, en Vilaxoane, e a avenida de Asturias, que é a entrada a Foz, xusto enfronte a Villa Modesta. Esta é unha zona de entrada e de saída perimetral, que sufre un estrangulamento porque a propiedade métese dentro da zona de influencia do viario”.
Castiñeira lembra que “no seu momento, hai varios anos, fíxose un estudo de detalle e preparouse todo ese viario cos anchos regulamentarios, pero que nunca se chegou a un acordo co propietario; e a día de hoxe logrouse grazas tamén á boa vontade del e ao afán que o Concello ten de habilitar ese cruce e de ampliar esa zona para darlle moita máis seguridade e moita máis capacidade. É unha moi boa nova porque queríamos inicialo antes de comezar os traballos na rúa Álvaro Cunqueiro. Con elo melloramos a mobilidade que vai ter o concello, sobre todo de tráfico, nunha zona alternativa como é a rúa Fonte da Cruz porque despois pode irse pola rúa do Pilar ou ben coller para a rúa do cemiterio. É unha rúa que bordea o centro urbano e especialmente de saída cara a Ribadeo”.
O alcalde salienta que “é un bo acordo e queda pendente unicamente de facer o pagamento do prezo acordado e elevalo a público, pero o acordo é totalmente firme”.
Javier Castiñeira manifesta que “pronto teremos esa nova conexión e hai que agradecer, por suposto, a actitude dos propietarios, sempre construtiva e loxicamente tamén velando no seu momento para que este cruce sexa moito máis seguro, moito máis práctico, e nos sirva a todos para seguir coa transformación do casco urbano de Foz”.