Cariño recupera o pavillón polideportivo municipal tras unha rehabilitación integral financiada en colaboración coa Xunta

A alcaldesa, Ana María López, recibiu ao conselleiro de Presidencia, Xustiza e Deportes, Diego Calvo, na visita institucional ás instalacións, que reabren completamente renovadas tras un investimento superior aos 237.000 euros

Cariño, 6 de agosto, 2026. O Concello de Cariño vén de culminar a rehabilitación integral do pavillón polideportivo municipal, unha das actuacións prioritarias impulsadas polo Goberno local desde o inicio do actual mandato para recuperar unha infraestrutura esencial para a práctica deportiva, a actividade educativa e a celebración de eventos sociais e comunitarios.

A alcaldesa de Cariño, Ana María López, acompañou hoxe ao conselleiro de Presidencia, Xustiza e Deportes, Diego Calvo, durante a visita institucional ás instalacións, na que puideron comprobar o resultado das obras executadas grazas ao convenio de colaboración entre o Concello de Cariño e a Xunta de Galicia. Na visita tamén estiveron presentes os concelleiros de Deportes e Cultura, Andrés Balado, e de Urbanismo, Alberto Balado.
A actuación supuxo un investimento de máis de 237.000 euros, dos que a Xunta financiou preto de 190.000 euros, o 80 % do importe total, mentres que o Concello asumiu o 20 % restante.

A alcaldesa destacou que “hoxe é un día moi importante para Cariño porque recuperamos un espazo que é de todos os veciños e veciñas. Este pavillón volve abrir as súas portas completamente renovado, despois dunha intervención integral que era imprescindible e que durante moitos anos non se levou a cabo”.

A rexedora lembrou que, ao inicio do mandato, o actual equipo de goberno atopouse cunhas instalacións nun avanzado estado de deterioración que obrigou a manter o pavillón pechado para garantir a seguridade das persoas usuarias. “Este Goberno apostou por facer as cousas ben, buscando financiamento, colaborando coa Xunta de Galicia e executando unha rehabilitación integral que garante a vida útil desta infraestrutura durante moitos anos”, sinalou.

Unha intervención integral

As obras permitiron resolver os problemas estruturais que presentaba o edificio, actuando principalmente sobre a cuberta para eliminar as filtracións que deterioraran a antiga pista deportiva. A intervención incluíu tamén a renovación do pavimento deportivo, a substitución das portas deterioradas, a adecuación das saídas de evacuación á normativa vixente e a retirada dos elementos de fibrocemento existentes, mellorando de forma significativa a seguridade, a accesibilidade e a funcionalidade das instalacións.

Con esta actuación, o pavillón municipal volve estar plenamente operativo para acoller a actividade dos clubs deportivos, das entidades locais e do alumnado do CEIP, ademais das numerosas actividades sociais e culturais que se desenvolven ao longo do ano. Trátase dunha infraestrutura clave para o municipio, na que se practican disciplinas como balonmán, baloncesto, fútbol sala, hóckey sobre patíns, voleibol, escalada ou tenis.

Durante a visita, o conselleiro Diego Calvo puxo en valor a colaboración entre administracións para seguir mellorando as instalacións deportivas municipais e destacou a importancia de ofrecer espazos seguros e adecuados para facilitar a práctica deportiva entre a cidadanía.

Ana María López subliñou que esta actuación “é o resultado dunha xestión eficaz e responsable, capaz de converter unha situación herdada de abandono nunha oportunidade para dotar a Cariño dunhas instalacións modernas, seguras e de calidade”.

A alcaldesa incidiu en que o actual Goberno municipal cumpre así un dos compromisos adquiridos coa veciñanza ao inicio da lexislatura, facendo realidade unha actuación que durante anos foi unha demanda histórica do municipio. A rexedora agradeceu finalmente a colaboración da Xunta de Galicia para facer posible este investimento, así como a comprensión mostrada polos clubs deportivos, a comunidade educativa e todas as persoas usuarias durante o tempo que duraron as obras.