FRUGA alerta da situación crítica do sector lácteo galego pola baixada de prezos e o aumento dos custos

Santiago de Compostela, 21 de setembro de 2026. O sector lácteo galego está a sufrir novamente os efectos dunha baixada de prezos. Esta última redución supón arredor de 8 céntimos menos por litro de leite, dependendo das distintas industrias recolledoras. A caída dos prezos está a provocar unha diminución moi importante nos ingresos das ganderías galegas, nun contexto no que os custos de produción das explotacións están a aumentar de maneira considerábel. O incremento do prezo dos carburantes repercute nos gastos propios das explotacións, no custo dos fertilizantes e doutros insumos, así como nos contratos con empresas de servizos. Ademais, a seca extrema deste verán está a reducir as principais colleitas forraxeiras e a poñer en risco o subministro de alimentación para os vindeiros meses. A suma de todos estes factores sitúa as explotacións de leite galegas nun momento especialmente crítico.

Na actualidade, Galiza percibe os prezos por litro de leite máis baixos do Estado español, un diferencial que non é puntual, senón que se arrastra desde hai 16 anos, concretamente desde 2010. En anos anteriores, especialmente en 2007, 2008 e 2009, chegouse a cobrar por riba da media estatal, coincidindo con outras políticas agrarias impulsadas pola Xunta de Galiza.

As causas desta situación son diversas, mais destaca a desaparición da Mesa do Leite, que permite que industria e distribución actúen libremente fixando prezos de maneira unilateral. A Lei da Cadea Alimentaria continúa a ser unha declaración de intencións sen efectos reais na garantía de prezos que cubran os custos de produción, sen impacto positivo para as ganderías.

O sector lácteo galego tamén se caracteriza pola ausencia dunha industria de base cooperativa que constitúa un verdadeiro grupo lácteo galego, que permita ás explotacións ter maior capacidade de negociación para acadar prezos dignos.

Outro dos grandes hándicaps é a falta dun goberno galego preocupado pola situación do sector e cun mínimo interese en actuar en beneficio do agro. As decisións tomadas nos últimos anos polos gobernos de Feijóo e Rueda resultaron contraproducentes para mellorar as condicións das ganderías lácteas.

Nos últimos días, as industrias lácteas están a falar de posibles subas de 2 céntimos para as próximas renovacións contractuais. Ademais de tratarse novamente de decisións unilaterais, desde FRUGA considérase que estas subas son totalmente insuficientes, tendo en conta que se prevén importantes baixadas na produción láctea tanto no Estado español como no conxunto de Europa, derivadas da seca deste verán. Teoricamente, unha diminución da produción debería implicar un aumento dos prezos, ao manterse a demanda.

Por todo isto, FRUGA considera imprescindible que a Xunta poña en marcha todos os mecanismos ao seu alcance para favorecer un aumento dos prezos acorde coa situación actual, comezando pola convocatoria da Mesa do Leite, e evitando que a gran distribución actúe libremente co apoio das industrias, en beneficio propio e poñendo en risco a viabilidade do sector leiteiro galego.