Ribadeo, 6 de agosto de 2018. As formacións musicais ribadenses A Gramola e Calabash volven ensaiar, despois duns anos de inactividade, para reaparecer nun concerto conxunto que ofrecerán este venres, día 10, ás 20:30 horas no Cine Teatro de Ribadeo con entrada gratuíta.
O músico ribadense Marcos Rodríguez, que é a cabeza visible desta iniciativa, explicou: “para nós, refírome a Olalla Canoura López, profesora de violín nas escolas municipais de música de Ribadeo e de Burela, e para min, que son o profesor de percusión na escola de Ribadeo, é un pracer volver reunir a xente con dous proxectos que tíñamos parados. Un deles é Calabash, un grupo de percusión de Ribadeo que levaba tres anos sen actuar, xa que debido ao relevo xeracional tivemos que esperar uns anos e agora temos uns rapaciños que xa poden animarnos un pouco a tarde, como veremos este venres. E por outro lado está A Gramola, un proxecto que puxemos a andar Olalla e máis eu hai dous anos para a festa de indianos de Ribadeo e o ano pasado intentamos reunilo outra vez pero o tempo pasa para todos e algúns nenos vanse estudar fóra e outros non poden, polo que o ano pasado foinos imposible, pero este ano decidimos xuntarnos para o mes de agosto e retomar eses dous proxectos: Calabash e A Gramola”.
Marcos Rodríguez engadiu que “en canto a repertorio A Gramola vai seguir no estilo de obras polo que xurdiu esta agrupación, que son boleros, chachachás, mambos e sambas, sempre coa corda como base, acompañada dun grupo de percusionistas e dunhas frautas e uns clarinetes, pero principalmente é unha agrupación de corda. Os asistentes ao concerto poderán escoitar un medley de boleros, Mambo Nº 5 e varios temas máis, pero tampouco vamos dicir agora todos. E Calabash segue na liña de anos atrás, con rock and roll, mambos, batukadas, principalmente ritmos latinos e xogando un pouco coas melodías na percusión. Normalmente os grupos de percusión que escoitamos por aí son de batukadas, con tarolas, repiques, surdos, … Pero nós xogamos coa base principal das láminas: marimbas, xilófonos, vibráfonos, …”
O promotor da actuación de A Gramola e Calabash tamén adiantou que “para rematar o concerto faremos tres temas xuntos, porque pensamos que é unha oportunidade para fusionar dúas agrupacións tan diferentes e pode saír algo especial. Soamente polo cariño que se está poñendo en facer realidade este proxecto pensamos que pode quedar entretido e pasar unhas horas en bo ambiente”.
Marcos Rodríguez explicou ademais que “A Gramola está formada por 30 músicos, con rapaciños desde 8 anos de idade, algúns que empezaron a tocar o violín en outubro do 2017 e xa se van animar a facer o seu primeiro concerto con 8 ou 9 obras, o que para eles será todo un reto. E Calabash imos ser entre 15 e 20 persoas nesta actuación. Polo tanto esperamos xuntar entre 45 e 50 músicos no escenario”.
As formacións musicais ribadenses Calabash e A Gramola reaparecen para actuar xuntas este venres no Cine Teatro de Ribadeo
Relacionado
Durante case dúas horas desenvolveuse unha conversa aberta arredor do mundo do espírito e do contido da obra, nun encontro ao que asistiu un grupo numeroso de persoas dispostas non só a escoitar, senón tamén a dialogar e compartir reflexións. Tras a intervención inicial de Pepe Peinó como responsable do proxecto, tomou a palabra o escritor Lionel Rexes, quen achegou novas perspectivas antes de abrir o debate ao público. As opinións, argumentos e matices sobre relixión, espiritualidade, Deus e os valores que sustentan a convivencia foron enchendo o espazo nun ambiente participativo e respectuoso, no que as diferenzas quedaron en segundo plano fronte á forza do diálogo, a solidariedade e o afecto.
A iniciativa xurdiu co obxectivo de xuntar o alumnado que coincidira na EGB, pero axiña se ampliou a todas aquelas persoas que compartiron pupitres e amizades tamén no instituto.
O público, totalmente entregado de principio a fin, amosouno cos intensos e prolongados aplausos que acompañaron toda a actuación. Ao remate, os asistentes expresaron o seu desexo de poder gozar no futuro de novos concertos do artista, que sen dúbida volverán entusiasmar ao público.
Villares subliñou o éxito de convocatoria do evento, que reúne cada ano a numerosos participantes e afeccionados en Ribadeo, “aproveitando o atractivo da ría e do seu porto deportivo para atraer visitantes e complementar co deporte a súa ampla oferta de natureza, patrimonio e gastronomía”. A presente edición estivo dedicada á figura de Leopoldo Calvo-Sotelo, con motivo do centenario do nacemento do que fora presidente do Goberno e alcalde honorario do municipio. Ademais das regatas de vela en distintas categorías, celebráronse bautizos de buceo, charlas ou un concurso de pesca, entre outras actividades.
Na xuntanza preténdese analizar a execución das obras, o comportamento da empresa responsable, a problemática dos accesos durante as Festas de Xunqueira e solicitar ao Concello de Viveiro que faga público o proxecto definitivo.
A marcha partirá ás 12:30 horas diante do Concello, percorrerá as rúas peonís do centro e rematará novamente na casa consistorial, onde se lerá un manifesto. A plataforma chama a mobilizarse cunha mensaxe clara: cada bomba destrúe vidas e cada silencio convértenos en cómplices. Defenden que é o momento de saír á rúa para esixir o fin da violencia, o respecto aos dereitos humanos e a liberdade do pobo palestino, lembrando que a presenza das persoas manifestantes é a voz de quen hoxe non pode falar. A convocatoria péchase cun triplo chamamento: non á guerra, non ao silencio e non á indiferenza.
