O Alcalde de Foz acusa de deslealdade á Deputación por plaxiar obras solicitadas polo equipo de goberno municipal

Foz, 14 de setembro de 2018. O alcalde de Foz, Javier Jorge Castiñeira, critica a deslealdade da Deputación Provincial de Lugo e concretamente do socialista Álvaro Santos, que volveu a Foz unha vez máis a plaxiar obras que solicitou o equipo de goberno. O rexedor engade que é un apropiamento e uso partidista das institucións. Ademais salienta que o PSOE de Foz nunca amosou ningún interese en arranxar a estrada da parroquia de San Martiño que visitou Álvaro Santos acompañado por representantes socialistas locais.
“Ao equipo de goberno do Concello de Foz sorpréndenos unha vez máis o señor Álvaro Santos facendo uso partidista dunha institución tan importante como é a Deputación de Lugo, porque volven plaxiar propostas que fixo o equipo de goberno do Concello de Foz, neste caso o arranxo dunha estrada da Deputación en San Martiño, que correspondía dentro do plan de arranxo de infraestruturas dos concellos, que foi pactada por todos os grupos na Deputación e que foi solicitada por este equipo de goberno”, manifestou Javier Castiñeira.
O rexedor municipal engadiu: “sorpréndenos que se atribúan agora esta obra cando nunca o Partido Socialista de Foz levou a ningún pleno nestes últimos catro anos o arranxo desa vía; e agora, unha vez que o solicita o equipo de goberno de Foz, pretenden atribuírse os méritos”.
Castiñeira subliña que “é unha deslealdade, un uso partidista absoluto das institucións e simplemente parece un plaxio máis do Partido Socialista, neste caso de Foz, que se apodera dunhas obras que non as fai ningún partido político senón que as fai unha institución, como é a Deputación de Lugo, a petición do Concello de Foz”.
Ademais o alcalde de Foz pídelle a Álvaro Santos que “deixe de usar as institucións como ferramenta e trampolín político e, en todo caso, que se preocupe un pouquiño máis de buscar o motivo polo que no seu concello non ten o apoio dos seus veciños, e agora quere usar a Deputación precisamente para obter certos méritos. Polo tanto trasladamos unha queixa novamente ao presidente da Deputación para que lle pare os pés a este señor, que verdadeiramente está mostrando unha deslealdade absoluta ás institucións, neste caso ao Concello de Foz”.