Foz, 11 de xaneiro de 2019. A XVI edición da Festa do Chícaro ou Berberecho celebrarase en Foz os días 19 e 20 deste mes de xaneiro. O programa de actividades foi presentado este mediodía nun acto que se desenvolveu na Casa da Cultura. Participaron o alcalde focense, Javier Jorge Castiñeira; o concelleiro do Mar, Pedro Fernández Manín; e a deputada provincial Mayra García Bermúdez.
O día 17 haberá unha charla sobre Marisqueo e Acuicultura en Galicia e o 19, a partir das 12:00 horas, será a inauguración da festa e o pregón, que pronunciará Eduardo Fraga, ex secretario da Confraría de Pescadores de Foz. Ese día na carpa instalada no peirao poderanse degustar chícaros en empanada, á provenzal, ao vapor e tamén con fabas de Lourenzá. Esta festa gastronómica tamén se desenvolverá en varios locais hostaleiros da vila o sábado e o domingo.
O concelleiro do Mar en Foz, Pedro Fernández Manín, destacou “a colaboración tanto da Deputación como da Xunta de Galicia nesta festa, que se considera a primeira festa gastronómica do ano en Galicia”.
O edil explicou que “o programa empezará o día 17 de xaneiro, xoves, ás once da mañá no salón de actos da Casa da Cultura de Foz, onde haberá unha charla sobre marisqueo e acuicultura en Galicia, impartida por Susana Novo Vázquez, Justa Ojeda Martínez e Bibiana Viñas, doutoras en Bioloxía e investigadoras do Centro de Cultivos Mariños de Ribadeo, da Consellería do Mar”.
Fernández Manín engadiu que “o 19 de xaneiro, que é o día grande, na carpa que estará instalada no peirao, ás doce da mañá, terá lugar o pregón e a apertura de stands. O pregón correrá a cargo de Eduardo Fraga Cociña, ex secretario da Confraría de Pescadores de Foz. Naceu en Celeiro e traballou alí na Confraría, logo foi secretario da Confraría do Vicedo e rematou a súa andaina como profesional na Confraría de Pescadores de Foz. Coñecedor dos problemas da zona e da ría de Foz, é unha persoa que pode adaptar o pregón a esta festa, que coñece perfectamente. A partir das 12:40 horas haberá unha actuación a cargo do grupo Mar Aberto de Foz”.
O concelleiro sinalou que “a elaboración do chícaro correrá a cargo da Escola de Hostalería do IES de Foz, que fará a tres preparacións: á provenzal, ao vapor e con fabas de Lourenzá. Ademais haberá empanada, que elaborará Confitería Anduriña”.
Pedro Fernández Manín anunciou que “durante todo o día estarán animadas as rúas por grupos folclóricos tradicionais galegos, ás sete e media da tarde volverá a actuar o grupo Mar Aberto e ás dez e media da noite terá lugar a actuación na carpa da charanga NBA. O prezo da ración será a 5 euros, e a bebida, tanto auga como cervexa e viño, será a 1 euro, os mesmos prezos do ano pasado. O día 20 seguirá a festa polos bares de Foz. Este día non estará aberta a carpa, que soamente funcionará o sábado 19 durante todo o día e ata que se esgote o produto”.
O edil subliñou que “esta festa conta coa colaboración da asociación Sempre Foz, que é a encargada da maior parte da preparación porque o Concello leva todo o que é o institucional. Salientar a colaboración da Deputación e da Xunta de Galicia. Ademais os empregados municipais son a alma máter da montaxe e encárganse de facer o reparto en cada unha das casetas”.
Pedro Fernández quixo invitar a todos a participar nesta festa: “esperámosvos o día 19 no peirao, e o 19 e 20 por todos os bares, onde haberá para degustar o que aquí na vila de Foz chamamos o chícaro e que é o típico berberecho”.
Presentada a XVI Festa do Chícaro, que se celebrará en Foz os días 19 e 20 deste mes
Relacionado
O alcalde, Dani Vega, fixo un balance moi positivo: “foi un concerto moi especial nun marco espectacular, como é a igrexa parroquial de Ribadeo, e no que o gaiteiro Carlos Núñez encandilou aos asistentes co seu repertorio. Todos os asistentes disfrutámolo moito”. Xunto a Carlos Núñez estiveron o rexedor e as concelleiras de Cultura, Turismo e Seguridade, Begoña Sanjurjo, Marta Saiz e Montse Seijo.
Durante case dúas horas desenvolveuse unha conversa aberta arredor do mundo do espírito e do contido da obra, nun encontro ao que asistiu un grupo numeroso de persoas dispostas non só a escoitar, senón tamén a dialogar e compartir reflexións. Tras a intervención inicial de Pepe Peinó como responsable do proxecto, tomou a palabra o escritor Lionel Rexes, quen achegou novas perspectivas antes de abrir o debate ao público. As opinións, argumentos e matices sobre relixión, espiritualidade, Deus e os valores que sustentan a convivencia foron enchendo o espazo nun ambiente participativo e respectuoso, no que as diferenzas quedaron en segundo plano fronte á forza do diálogo, a solidariedade e o afecto.
Foron os propios implicados quen contactaron co 112 Galicia pasada a medianoite deste domingo. O vehículo no que viaxaban saíuse da vía na LU-132, en Cabarcos, Barreiros. A posición na que quedou o coche, inclinado sobre un terraplén, complicou o acceso dos profesionais de Urxencias Sanitarias de Galicia-061, por iso, os xestores do Centro Integrado de Artención ás Emerxencias de Galicia avisaron aos Bombeiros de Barreiros. Finalmente, só tiveron que rescatar a un dos dous ocupantes, o copiloto, e, para iso, tiveron que cortar os asentos. Do mesmo xeito, o equipo médico só trasladou a unha persoa.
A iniciativa xurdiu co obxectivo de xuntar o alumnado que coincidira na EGB, pero axiña se ampliou a todas aquelas persoas que compartiron pupitres e amizades tamén no instituto.
O público, totalmente entregado de principio a fin, amosouno cos intensos e prolongados aplausos que acompañaron toda a actuación. Ao remate, os asistentes expresaron o seu desexo de poder gozar no futuro de novos concertos do artista, que sen dúbida volverán entusiasmar ao público.
Villares subliñou o éxito de convocatoria do evento, que reúne cada ano a numerosos participantes e afeccionados en Ribadeo, “aproveitando o atractivo da ría e do seu porto deportivo para atraer visitantes e complementar co deporte a súa ampla oferta de natureza, patrimonio e gastronomía”. A presente edición estivo dedicada á figura de Leopoldo Calvo-Sotelo, con motivo do centenario do nacemento do que fora presidente do Goberno e alcalde honorario do municipio. Ademais das regatas de vela en distintas categorías, celebráronse bautizos de buceo, charlas ou un concurso de pesca, entre outras actividades.
Na xuntanza preténdese analizar a execución das obras, o comportamento da empresa responsable, a problemática dos accesos durante as Festas de Xunqueira e solicitar ao Concello de Viveiro que faga público o proxecto definitivo.
