O Concello atópase profundamente satisfeito despois de que o Consello da Xunta autorizase a licitación das obras de mellora das liñas de tratamento da depuradora de augas residuais de Viveiro

 Viveiro, 13 de setembro de 2019. O Concello de Viveiro atópase profundamente satisfeito despois de que, no día de onte, o Consello da Xunta de Galicia autorizase a licitación das obras de mellora das liñas de tratamento da depuradora de augas residuais de Viveiro. A execución das obras é unha demanda que dende o concello se veu reivindicando ao longos dos anos, conscientes de que se trata de un dos temas máis importantes para este concello; agardamos que a segunda fase desta actuación, que agora mesmo se atopa á espera do informe de Patrimonio, se tramite coa máxima celeridade co fin de que o saneamento da ría de Viveiro poida ser unha realidade á maior brevidade posible.

Quero aproveitar a ocasión, así mesmo, para agradecer á Plataforma Pro-Celeiro polo seu traballo, por convocar diversas concentracións e manifestacións e por sumarse a esta demanda co fin de solucionar a situación na que se atopa a ría de Viveiro. Creo que é importante que a xente saia á rúa e creo que, neste caso en concreto, a mobilización veciñal puido servir para axilizar os trámites dun expediente no que, por parte do concello, sempre se traballou coa máxima celeridade. Agardo tamén que a constitución desta plataforma poida servir para axilizar os trámites que permitirán a execución da segunda fase desta actuación e, por suposto, manifestar publicamente a disponibilidade do concello para tramitar á maior brevidade posible cantos requirimentos se reciban neste sentido.

A Alcaldesa-Presidenta,
María Loureiro García