Lugo, 30 de xuño, 2020. O portavoz popular, Javier Castiñeira, amosou na sesión plenaria deste martes “a preocupación” dos populares ante a situación de Alcoa. Recordou que “xa anticipabamos na sesión plenaria anterior que habería problemas e volvemos a vir a outro pleno, un mes despois, sen ter un estatuto electrointensivo -que leva dous anos de retraso- que é o que realmente importa e serviría para garantir a competitividade da fábrica e a súa continuidade na Mariña”
En relación á moción presentada polo BNG, o voceiro sinalou que se trata dunha “iniciativa oportunista”. Dixo: “Non hai máis debate que non sexa o da aprobación do estatuto. A nacionalización da planta de Alcoa e a tarifa galega son fogos de artificio”, defendeu Castiñeira.
O voceiro dos populares dixo estar de acordo en que “o Goberno interveña para o establecemento dunha tarifa eléctrica con prezos de entre 25 e 35 euros e convocando unha nova poxa de ininterrumpibilidade que inclúe os bloques de 90 MW que quitou na súa última proposta”. Pediu tamén Castiñeira: “Que interveña incrementando as axudas por CO2 e, se non chega, e baixo a tutela da Unión Europea, ten que intervir cun marcado CE, tamén o vemos ben; o que non vemos ben é a nacionalización ou expropiación como propón o BNG”.
En relación á tarifa eléctrica galega asegurou que “sería moi prexudicial para os galegos e para a industria”. Nese sentido, recordou o peche da central de Meirama e o caso de As Pontes.
AUGASMESTAS
Por outra banda, o Grupo Provincial do PP logrou hoxe que o goberno provincial se comprometa a poñer en servizo o complexo de Augasmestas, no municipio de Quiroga, no vindeiro ano 2021. Así o destaca o voceiro popular, Javier Castiñeira, despois de escoitar as respostas do goberno da Deputación a unha moción que presentaron os populares no pleno deste martes, 30 de xuño, para instar, unha vez máis, á posta en funcionamento do citado complexo turístico.
Agardan dende o Grupo Provincial Popular que “se cumpra o obxectivo de telo aberto no 2021 e que o novo intento non queda en nada coma outros anuncios realizados nos últimos dez anos: o proxecto para convertelo en centro de ocio para discapacitados ou o concurso público do 2014 para xestionar o complexo”, por poñer algúns exemplos. En calquera caso, o voceiro popular insiste en que “sempre chegan tarde en todo o que fan”.
Castiñeira sinalou, durante a súa intervención, que “o complexo recreativo de Augasmestas -situado a carón do río Lor preto da desembocadura co Sil- está abandonado e inutilizado cando podía estar funcionando perfectamente”. Culpa o popular desta situación “á ineficiente xestión turística do actual goberno” en relación ás instalacións deste complexo “situado nun enclave pertencente á Ribeira Sacra, candidata a Patrimonio da Humanidade”.
O voceiro do Grupo Provincial do Partido Popular sinalou que “xa fixemos constar noutras ocasións a necesidade de intervir en Augasmestas a través de distintas iniciativas nos últimos anos; pero sen resultado. Agora que a campaña do 2020 está perdida, agardamos que no 2021 podamos disfrutar destas instalacións adaptadas ao que require o turismo na natureza, unha das actuación que recolle o Plan Estratéxico de Turismo”.
Tamén asegurou que “os gobernos bipartitos resultaron funestos para estas instalacións que permanecen pechadas dende o 2006”. Engadiu que “co seu abandono, o complexo caeu en desgraza e sufriu actos vandálicos ante os que o organismo provincial tivo actuar e acometer obras para a súa reparación. Con todo, continúa pechado”, lamentou. “É inconcibible que se deixen caer estas instalacións que costaron preto de 2 millóns ás arcas públicas desta institución e se impida que os turistas visiten e pernocten na zona”, engadiu.
ABANDONO DOS RECURSOS FLUVIAIS
O voceiro popular destacou que nas visitas que fixo ao complexo comprobou que había unha “enorme cantidade de herba e maleza nas inmediacións das instalacións, que supón un gran risco de incendio que podería danalas irremediablemente”. Por iso defendeu que “o Goberno provincial ten que actuar e non esperar a que sexa tarde como pasou co catamarán do Miño que deixaron afundir e agora podrece nun prado en Begonte”.
“É competencia da Deputación coidar o seu patrimonio para evitar que se afunda coma o fixo o Pelegrín I”, segundo indicou Castiñeira que tamén asegurou que “o Goberno provincial ten abandonada a xestión dos seus recursos fluviais”. A portavoz socialista neste asunto asegurou, en canto ao funcionamento das instalacións na campaña de verán do 2021, a proposta dos populares “concorda coas nosas previsións nas actuacións”. Castiñeira lamentou que por non intervir a tempo, na área de Aguasmestas se perda a tempada de verán do ano en curso.
Durante case dúas horas desenvolveuse unha conversa aberta arredor do mundo do espírito e do contido da obra, nun encontro ao que asistiu un grupo numeroso de persoas dispostas non só a escoitar, senón tamén a dialogar e compartir reflexións. Tras a intervención inicial de Pepe Peinó como responsable do proxecto, tomou a palabra o escritor Lionel Rexes, quen achegou novas perspectivas antes de abrir o debate ao público. As opinións, argumentos e matices sobre relixión, espiritualidade, Deus e os valores que sustentan a convivencia foron enchendo o espazo nun ambiente participativo e respectuoso, no que as diferenzas quedaron en segundo plano fronte á forza do diálogo, a solidariedade e o afecto.
Foron os propios implicados quen contactaron co 112 Galicia pasada a medianoite deste domingo. O vehículo no que viaxaban saíuse da vía na LU-132, en Cabarcos, Barreiros. A posición na que quedou o coche, inclinado sobre un terraplén, complicou o acceso dos profesionais de Urxencias Sanitarias de Galicia-061, por iso, os xestores do Centro Integrado de Artención ás Emerxencias de Galicia avisaron aos Bombeiros de Barreiros. Finalmente, só tiveron que rescatar a un dos dous ocupantes, o copiloto, e, para iso, tiveron que cortar os asentos. Do mesmo xeito, o equipo médico só trasladou a unha persoa.
A iniciativa xurdiu co obxectivo de xuntar o alumnado que coincidira na EGB, pero axiña se ampliou a todas aquelas persoas que compartiron pupitres e amizades tamén no instituto.
O público, totalmente entregado de principio a fin, amosouno cos intensos e prolongados aplausos que acompañaron toda a actuación. Ao remate, os asistentes expresaron o seu desexo de poder gozar no futuro de novos concertos do artista, que sen dúbida volverán entusiasmar ao público.
Villares subliñou o éxito de convocatoria do evento, que reúne cada ano a numerosos participantes e afeccionados en Ribadeo, “aproveitando o atractivo da ría e do seu porto deportivo para atraer visitantes e complementar co deporte a súa ampla oferta de natureza, patrimonio e gastronomía”. A presente edición estivo dedicada á figura de Leopoldo Calvo-Sotelo, con motivo do centenario do nacemento do que fora presidente do Goberno e alcalde honorario do municipio. Ademais das regatas de vela en distintas categorías, celebráronse bautizos de buceo, charlas ou un concurso de pesca, entre outras actividades.
Na xuntanza preténdese analizar a execución das obras, o comportamento da empresa responsable, a problemática dos accesos durante as Festas de Xunqueira e solicitar ao Concello de Viveiro que faga público o proxecto definitivo.
A marcha partirá ás 12:30 horas diante do Concello, percorrerá as rúas peonís do centro e rematará novamente na casa consistorial, onde se lerá un manifesto. A plataforma chama a mobilizarse cunha mensaxe clara: cada bomba destrúe vidas e cada silencio convértenos en cómplices. Defenden que é o momento de saír á rúa para esixir o fin da violencia, o respecto aos dereitos humanos e a liberdade do pobo palestino, lembrando que a presenza das persoas manifestantes é a voz de quen hoxe non pode falar. A convocatoria péchase cun triplo chamamento: non á guerra, non ao silencio e non á indiferenza.
