O Concello de Viveiro establece dúas quendas para o mercado quincenal, que volve desde o 1 de outubro á súa ubicación habitual

 Viveiro, 28 de setembro de 2020. O Concello de Viveiro informa aos veciños e veciñas de Viveiro que, a partir do vindeiro 1 de outubro, se reanuda a celebración do mercado quincenal na súa ubicación habitual.

As medidas de seguridade e prevención establecidas polas autoridades competentes dende o primeiro momento para os mercados con respecto a aforos, distancias, porcentaxes, etc. determinaron as decisións adoptadas por este goberno con respecto á reanudación tanto do mercado quincenal como do semanal.

A intención do concello sempre foi buscar a opción máis favorable para non prexudicar a ningún posto, buscando ubicacións alternativas que permitisen a instalación de todos. No caso do mercado semanal, isto foi posible co seu traslado temporal aos xardíns Noriega Varela.

No caso do mercado quincenal, tamén se buscou unha ubicación alternativa que permitise a colocación de todos nun espazo o suficientemente amplo e céntrico para permitir o cumprimento das medidas de saúde e seguridade, pero esta reubicación non foi posible, polo que se decidiu reanudar a súa celebración o 1 de outubro no lugar habitual, establecendo dúas quendas.

A metade dos postos asistirá o día 1 e a outra metade asistirá o 3º domingo de mes; a distribución destas quendas realizouse atendendo á colocación dos postos dentro do propio espazo, co fin de garantir o distanciamento necesario entre cada un deles, para o que se seguiu un criterio similar ao establecido no mercado semanal: distancia duns 6 metros entre postos, dispostos en triángulo, cunha vía de tránsito, etc.

Enténdese que esta é a mellor alternativa e a máis igualitaria atendendo á situación actual, pero o Concello de Viveiro segue valorando outras posibilidades co fin de permitir a colocación de todos os postos.