“O alcalde non ten credibilidade, pois nin tan sequera reside en Muras e, cando fala, faino dende o despacho e cobrando do Concello”, afirma Eugenia Requeijo

Muras, 17 de xaneiro de 2022. A voceira do Grupo Municipal do PP de Muras, Eugenia Requeijo, sae ao paso das declaracións realizadas polo rexedor esta fin de semana, concluíndo que “o alcalde non ten credibilidade, pois nin tan sequera reside aquí e, cando fala, faino dende o despacho e cobrando do Concello”. Así o indica logo de que o dirixente municipal fixese alusións á formación da que forma parte Eugenia Requeijo.

“Non entendemos o atrevemento do alcalde. Sinceramente parécenos moi atrevido o que di, xa que todos os veciños sabemos que el vai e vén todos os días. Por vivir, nin tan sequera vive en Muras nin na provincia”. Por tanto, apunta: “todo o que diga a este respecto, carece de rigor”. “É máis, ninguén llo cre”, asegura a voceira do PP.

A este respecto, Eugenia Requeijo considera que o nacionalista debería de ter “máis humidade política”, xa que “o único polo que se lle coñece e por falar sen xeito”, pois “o que é apoiar aos veciños e aos gandeiros, iso non lle importa”. A popular lembra así como o alcalde votou en contra da moción do PP, a través da que se pedía ao Goberno non protexer ao lobo e, pola conta, si aos gandeiros.

Por este motivo, os populares consideran que Muras “o que precisa é un alcalde que defenda ao pobo e non un alcalde que o único que fai é venerar as súas crenzas políticas e non os intereses dos veciños”. Diante esta “triste realidade”, Eugenia Requeijo di que “non nos quedaremos calados e seguiremos pelexando polo que nos trasladan os nosos veciños”.