Un helicóptero de Gardacostas rescatou a un operario ferido na Fonsagrada tras caerlle unha árbore enriba

A Fonsagrada, 13 de decembro, 2022. O operario que realizaba traballos de tala nun monte, no lugar de Sudros, en San Pedro de Río (A Fonsagrada), resultou ferido tras caerlle unha árbore enriba.

Finalmente, aínda que ata o lugar se desprazou un helicóptero medicalizado, debido ás malas condicións do terreo, de gran pendente, foi necesaria a intervención do helicóptero de rescate, Pesca II, do Servizo de Gardacostas de Galicia, que rescatou ao ferido e trasladouno ata o heliporto de Celeiro. Alí, o agardaba un equipo médico para practicarlle os primeiros auxilios. Unha vez estabilizado, o paciente foi trasladado nunha ambulancia medicalizada do Servizo de Urxencias Sanitarias de Galicia-061.

Cómpre recordar que o 112 Galicia tivo constancia do accidente ao fío das 13 horas deste mediodía, a través dun compañeiro do operario que resultou ferido.

A partir de aí, os xestores de emerxencias puxeron en marcha o operativo no que participaron ademais dos servizos sanitarios de urxencia e do persoal do Servizo de Gardacostas de Galicia, a Garda Civil e os efectivos da Agrupación de Voluntarios de Protección Civil da localidade.