Ribadeo, 16 de marzo, 2023. Nesta semana pasada distribuíuse polas casas ribadenses un novo número do “Parladoiro” no que se fai balance da acción de goberno do grupo municipal do BNG no concello de Ribadeo. Baixo o título “Ribadeo avanza contigo”, as compañeiras e compañeiros do grupo municipal do BNG que gobernan o concello de Ribadeo dannos a coñecer o labor feito ao longo destes catro anos. Tanto Fernando Suárez Barcia, alcalde de Ribadeo desde o 2007, como Pablo Vizoso Galdo, o concelleiro de Economía, Desenvolvemento Local e Turismo, e candidato á alcaldía, e as demais compañeiras e compañeiros de goberno, lémbrannos todo o esforzo feito durante este mandato para facer que Ribadeo siga a mirar cara ao futuro.
En conxunto destaca que son un goberno fiábel, que proporciona seguridade á xente. Ademais, foron quen de amosar capacidade de diálogo e moita disposición a escoitar ás veciñas e veciños de Ribadeo combinadas coa perseverancia, rigor e determinación necesarias á hora de tomar decisións difíciles. Esa actitude foi a que permitiu facer de Ribadeo un concello solvente e saneado, que á súa vez nos permite asumir novos retos. Porque Ribadeo non se pode deter. O labor de goberno do grupo municipal do BNG, se logra renovar a confianza dos veciños e veciñas de Ribadeo, seguirá sacando adiante novos proxectos e desenvolvendo os actualmente postos en marcha.
Fernando Suárez Barcia valora moi positivamente a grande transformación que viviu o concello desde que o BNG asumiu as rendas da corporación municipal. Mostrou o seu orgullo por poder ter representado á sociedade ribadense ao longo destes anos e destacou a súa satisfacción por ter visto a toda a veciñanza unida a carón de proxectos como, por exemplo, o da Residencia de Maiores. Lamentou a falta de miras da Xunta de Galicia que, por razóns exclusivamente partidarias e por puro interese electoral, marxinou, e segue a marxinar Ribadeo, negándolle o pan e o sal por carraxe cara a un pobo que soubo loitar unido por un ben colectivo.
Pola súa banda, Pablo Vizoso Galdo mostra a súa ilusión por tomar o relevo na dirección do goberno de Ribadeo e debuxou as principais liñas de actuación de varias medidas xa comezadas neste mandato. Puxo como singular referente o desenvolvemento dunha política de promoción turística a través do Plan Especial das Catedrais que redunde en beneficio de todo o concello, e a creación de novos roteiros culturais pola vila e as parroquias. Tamén subliña a importancia de seguir apostando polo polígono industrial e implementar a promoción e saídas dos nosos produtos locais.
Cada unha das concelleiras e concelleiros que ostentan, ou ostentaron responsabilidades de goberno ao longo do mandato, relataron as principais medidas desenvolvidas nas súas áreas. O recordatorio da licitación e execución dun bo número de obras, tanto na vila como nas parroquias (rúas, instalacións deportivas, locais sociais ou estradas) é acompañado dunha importante reportaxe gráfica. Toda a actividade cultural, deportiva e xuvenil da que se fai balance está encamiñada, fundamentalmente, a dar calidade de vida ás veciñas e veciños de Ribadeo. Pero tamén se converten nun elemento dinamizador da nosa actividade económica.
A área socio-sanitaria ocupa un lugar singular neste Parladoiro. Lémbrannos os membros do goberno que, se ben é necesario un novo centro de saúde (de feito desde o goberno municipal estase a traballar para ceder á Xunta de Galicia os terreos necesarios para a súa construción), máis importante é dotalos de persoal suficiente para que a persoas se sintan ben atendidas. De pouco serven grandes instalacións se non hai persoal suficiente para atender os doentes.
Tamén se destaca a principal aposta deste goberno municipal sustentando polo BNG: a reforma integral do Hospital Asilo para facer del unha moderna residencia. Pregúntase o grupo municipal do BNG se a Xunta de Galicia vai cometer o mesmo atropelo con Ribadeo que cando se negou a apoiar economicamente a Residencia de Maiores. En todo caso, que saiba a veciñanza de Ribadeo que o BNG de Ribadeo, o grupo de goberno que agardamos configurar tras as eleccións de maio, imos apostar decididamente pola construción desa nova residencia, logrando así que Ribadeo conte con ata 90 prazas públicas para persoas maiores.
Ribadeo non se pode deter; temos que seguir adiante. E o BNG, e o grupo municipal que apoia, ten demostrado ao longo destes anos que é de fiar, que é responsábel, que non lle falla á xente. O seu principal aval é o traballo feito.
Durante case dúas horas desenvolveuse unha conversa aberta arredor do mundo do espírito e do contido da obra, nun encontro ao que asistiu un grupo numeroso de persoas dispostas non só a escoitar, senón tamén a dialogar e compartir reflexións. Tras a intervención inicial de Pepe Peinó como responsable do proxecto, tomou a palabra o escritor Lionel Rexes, quen achegou novas perspectivas antes de abrir o debate ao público. As opinións, argumentos e matices sobre relixión, espiritualidade, Deus e os valores que sustentan a convivencia foron enchendo o espazo nun ambiente participativo e respectuoso, no que as diferenzas quedaron en segundo plano fronte á forza do diálogo, a solidariedade e o afecto.
Foron os propios implicados quen contactaron co 112 Galicia pasada a medianoite deste domingo. O vehículo no que viaxaban saíuse da vía na LU-132, en Cabarcos, Barreiros. A posición na que quedou o coche, inclinado sobre un terraplén, complicou o acceso dos profesionais de Urxencias Sanitarias de Galicia-061, por iso, os xestores do Centro Integrado de Artención ás Emerxencias de Galicia avisaron aos Bombeiros de Barreiros. Finalmente, só tiveron que rescatar a un dos dous ocupantes, o copiloto, e, para iso, tiveron que cortar os asentos. Do mesmo xeito, o equipo médico só trasladou a unha persoa.
A iniciativa xurdiu co obxectivo de xuntar o alumnado que coincidira na EGB, pero axiña se ampliou a todas aquelas persoas que compartiron pupitres e amizades tamén no instituto.
Villares subliñou o éxito de convocatoria do evento, que reúne cada ano a numerosos participantes e afeccionados en Ribadeo, “aproveitando o atractivo da ría e do seu porto deportivo para atraer visitantes e complementar co deporte a súa ampla oferta de natureza, patrimonio e gastronomía”. A presente edición estivo dedicada á figura de Leopoldo Calvo-Sotelo, con motivo do centenario do nacemento do que fora presidente do Goberno e alcalde honorario do municipio. Ademais das regatas de vela en distintas categorías, celebráronse bautizos de buceo, charlas ou un concurso de pesca, entre outras actividades.
Na xuntanza preténdese analizar a execución das obras, o comportamento da empresa responsable, a problemática dos accesos durante as Festas de Xunqueira e solicitar ao Concello de Viveiro que faga público o proxecto definitivo.
A marcha partirá ás 12:30 horas diante do Concello, percorrerá as rúas peonís do centro e rematará novamente na casa consistorial, onde se lerá un manifesto. A plataforma chama a mobilizarse cunha mensaxe clara: cada bomba destrúe vidas e cada silencio convértenos en cómplices. Defenden que é o momento de saír á rúa para esixir o fin da violencia, o respecto aos dereitos humanos e a liberdade do pobo palestino, lembrando que a presenza das persoas manifestantes é a voz de quen hoxe non pode falar. A convocatoria péchase cun triplo chamamento: non á guerra, non ao silencio e non á indiferenza.
