Javier Castiñeira critica as formas do alcalde de Foz que “para tapar as súas vergoñas” modifica os acordos da corporación ao seu antollo e mañá celebraranse dous plenos consecutivos, o extraordinario da crise da auga, solicitado polo Partido Popular, e o ordinario no que pretende aprobar a suba das taxas da residencia de anciáns
Foz, 25 de setembro de 2023. O Partido Popular de Foz critica as formas do alcalde do municipio que “para tapar as súas vergoñas e non asumir responsabilidade algunha” algo para o que mañá martes celebraranse, de xeito consecutivo, dous plenos moi importantes “para así tentar escorrer o bulto”.
Javier Castiñeira explica que, cando se conformou a corporación municipal, un dos acordos realizados foi o de celebrar o último xoves de cada mes o pleno ordinario, algo que este mes non vai a respectar. “Cajoto determina que no mesmo día se celebren o pleno extraordinario e o ordinario porque non ten argumentos para defender a súa nefasta xestión á fronte da crise co abastecemento de auga potable”, denunciou.
Deste xeito, mañá martes celebrarase dous plenos —o ordinario de setembro e o extraordinario solicitado polo Partido Popular— sendo esta a estratexia do alcalde para tentar “pasar páxina de dous clamorosos erros da súa xestión”. Por unha banda, a nefasta xestión da crise da auga e, por outra, a suba de prezos que quere impoñer o alcalde de Foz na residencia de anciáns do municipio.
“Por que fai iso o alcalde: para tapar a súa nefasta xestión co problema da auga, onde o único que fixo foi ser a voz da empresa concesionaria do servizo”, afirmou Castiñeira, que pregunta que “a que lle ten medo o señor Cajoto. Por que non se poden celebrar os plenos como tiña que ser, un o martes e outro o xoves? Por que atrasou tanto o pleno extraordinario que solicitou o Partido Popular para aclarar o que realmente sucedeu co abastecemento de auga potable?”.
O único que está claro é que despois de estar parte de agosto e todo o que levamos de setembro sen auga potable é que non hai solucións por parte do goberno local, máis alá de recomendar a compra de auga embotellada. “Non se asumiron responsabilidades, algo ao que nos ten acostumados o señor Cajoto, que nunca asume nada. A culpa sempre a teñen os demais”, criticou.
Dende o PP de Foz denuncian que non se trata dunha situación nova. No mandato pasado xa vivimos esas cacicadas de mover os plenos —último xoves de cada mes— á conveniencia única e exclusiva do señor Cajoto. “Volve a ser unha falta de respecto máis, das múltiples ás que nos ten acostumados o alcalde. Unha falta de respecto a todos os veciños xa que non asume os graves problemas que todos sufrimos no municipio”.
“Unha actitude lamentable a do alcalde, como tamén a de aqueles concelleiros que llo permiten, como os edís do BNG, que no mandato pasado demostraron que son submisos políticos do señor Cajoto e seguen na mesma liña”, rematou.
Durante case dúas horas desenvolveuse unha conversa aberta arredor do mundo do espírito e do contido da obra, nun encontro ao que asistiu un grupo numeroso de persoas dispostas non só a escoitar, senón tamén a dialogar e compartir reflexións. Tras a intervención inicial de Pepe Peinó como responsable do proxecto, tomou a palabra o escritor Lionel Rexes, quen achegou novas perspectivas antes de abrir o debate ao público. As opinións, argumentos e matices sobre relixión, espiritualidade, Deus e os valores que sustentan a convivencia foron enchendo o espazo nun ambiente participativo e respectuoso, no que as diferenzas quedaron en segundo plano fronte á forza do diálogo, a solidariedade e o afecto.
Foron os propios implicados quen contactaron co 112 Galicia pasada a medianoite deste domingo. O vehículo no que viaxaban saíuse da vía na LU-132, en Cabarcos, Barreiros. A posición na que quedou o coche, inclinado sobre un terraplén, complicou o acceso dos profesionais de Urxencias Sanitarias de Galicia-061, por iso, os xestores do Centro Integrado de Artención ás Emerxencias de Galicia avisaron aos Bombeiros de Barreiros. Finalmente, só tiveron que rescatar a un dos dous ocupantes, o copiloto, e, para iso, tiveron que cortar os asentos. Do mesmo xeito, o equipo médico só trasladou a unha persoa.
A iniciativa xurdiu co obxectivo de xuntar o alumnado que coincidira na EGB, pero axiña se ampliou a todas aquelas persoas que compartiron pupitres e amizades tamén no instituto.
O público, totalmente entregado de principio a fin, amosouno cos intensos e prolongados aplausos que acompañaron toda a actuación. Ao remate, os asistentes expresaron o seu desexo de poder gozar no futuro de novos concertos do artista, que sen dúbida volverán entusiasmar ao público.
Villares subliñou o éxito de convocatoria do evento, que reúne cada ano a numerosos participantes e afeccionados en Ribadeo, “aproveitando o atractivo da ría e do seu porto deportivo para atraer visitantes e complementar co deporte a súa ampla oferta de natureza, patrimonio e gastronomía”. A presente edición estivo dedicada á figura de Leopoldo Calvo-Sotelo, con motivo do centenario do nacemento do que fora presidente do Goberno e alcalde honorario do municipio. Ademais das regatas de vela en distintas categorías, celebráronse bautizos de buceo, charlas ou un concurso de pesca, entre outras actividades.
Na xuntanza preténdese analizar a execución das obras, o comportamento da empresa responsable, a problemática dos accesos durante as Festas de Xunqueira e solicitar ao Concello de Viveiro que faga público o proxecto definitivo.
A marcha partirá ás 12:30 horas diante do Concello, percorrerá as rúas peonís do centro e rematará novamente na casa consistorial, onde se lerá un manifesto. A plataforma chama a mobilizarse cunha mensaxe clara: cada bomba destrúe vidas e cada silencio convértenos en cómplices. Defenden que é o momento de saír á rúa para esixir o fin da violencia, o respecto aos dereitos humanos e a liberdade do pobo palestino, lembrando que a presenza das persoas manifestantes é a voz de quen hoxe non pode falar. A convocatoria péchase cun triplo chamamento: non á guerra, non ao silencio e non á indiferenza.
