Ribadeo contará cun miradoiro na desembocadura da ría

Ribadeo, 18 de decembro de 2023. Ribadeo contará cun miradoiro na desembocadura da ría, no que conxugará verde, pedra e madeira. Os traballos xa deron comezo.

O alcalde, Dani Vega, dixo que “seguimos traballando e colaborando con todas as administración. Nosoutros, sempre o dixemos, que había que estar na xestión de recursos para Ribadeo. Neste caso o goberno do Estado, a través de Costas, ao que lle quero agradecer toda a colaboración que desde primeiro momento mostrou con Ribadeo e ao seu xefe provincial, José Miguel Esteban, por esa axuda constante e tamén por trasladar propostas, como fai constantemente”.

O rexedor explicou que “nesta ocasión, cando nós chegamos ao goberno local, explicounos que había a posibilidade de facer un miradoiro na desembocadura da ría de Ribadeo, ao lado do Cargadoiro, que conxugara verde, pedra e madeira, que son elementos que unen e combinan perfectamente e convertelo nun espazo turístico desde o que poidamos contemplar, observar a nosa ría”.

Vega subliñou: “isto é o que se conseguiu, unha xestión moi importante para seguir mellorando as contornas verdes, un dos pulmóns de Ribadeo. Nos, cando estabamos na oposición, xa trasladabamos esta mesma proposta ao goberno municipal anterior no pleno, onde votaron en contra”. E indicou que “nos seguimos con ese traballo constante, con esa teima de seguir facendo cousas para mellorar Ribadeo e nese mesmo discurso que entre todos podémolo facer, sen lugar a dúbidas. E traballar conxuntamente coas administracións, neste caso con Costas, a cuxo xefe provincial lle agradezo todo o traballo e dedicación. Queremos seguir nesta liña de xestión, inversión para mellorar Ribadeo”.

Estímase que as obras de construción deste miradoiro rematarán o vindeiro mes de febreiro.