Ameijide: “Nos tres primeiros meses do ano xa se tramitaron 21 reclamacións por danos en vehículos nas estradas da Deputación”

Este volume de reclamacións tramitadas certifica o que levamos meses denuncuando dende o PP: “O nefasto estado de conservación da rede viaria provincial é unha realidade que nin PSOE nin BNG poden negar, o que está a xerar danos materiais e económicos aos lucenses, así como poñendo en risco a seguridade viaria e a integridade dos condutores”

Lugo, 10 de abril de 2025. O voceiro provincial popular, Antonio Ameijide, desvela que nos tres primeiros meses do ano xa se tramitaron 21 reclamacións ante a Deputación de Lugo por danos producidos en vehículos na rede viaria provincial, derivados do “nefasto estado de conservación das estradas provinciais”.

Antonio Ameijide sinala que estas reclamacións producíronse en concellos de toda a provincia, como O Corgo, Xermade, Pantón, Castro, Friol, Guitiriz ou Cospeito. “Todos os lucenses que a diario circulamos polas estradas da nosa provincia sabemos que hai dous tipos de estradas que está nun estado de conservación moi malo, as que dependen do Goberno do Estado e as que dependen da Deputación de Lugo”, explicou.

A realidade é que PSOE e BNG abandonaron por completo as estradas provinciais. “Levamos moitos anos denunciando a falta total de mantemento” o que derivou en que no que levamos de ano xa se produciron estas 21 reclamacións ante a Deputación por danos sufridos en vehículos polas fochancas e as deficiencias da rede viaria provincial.

“Son un verdadeiro perigo para os condutores que a diario percorremos a rede viaria provincial”, denunciou, con socavóns de grandes dimesións, chegando algúns a ter máis de 20cm de profundidade.

Unha das reclamacións efectuadas ante a Deputación é a dunha veciña que sufriu un rebentón nunha roda na estrada provincial LU-P-2303. No propio informe establécese que “pódese ver na estrada dous baches, a saída dunha curva, e que por mor da chuvia atópanse cheos de auga. Feitas as medicións, o bache que sinala o condutor como causante do rebentón do pneumático, ten entre 5 e 6cm de profundidade no seu contorno, sendo máis profundo na súa parte central, medindo aproximadamente 1,10m de longo e 1m de ancho”.

Outra das reclamacións exercidas ante a Deputación de Lugo é a dunha veciña que circulando pola estrada LU-P-4113, en Pantón, sufriu danos no seu vehículo a causa dunha fochanca “de grandes dimensións, de 80x60cm”. No informe establécese que “se realiza inspección ocular del lugar del siniestro comprobando la existencia de un socavón con dimensiones 80x60cm de ancho dentro de la zona de circulación de los vehículos el cual no se encontraba señalizado”.

Outra das reclamacións sinala que en Cospeito, na LU-P-1706 “no punto quilométrico 4,85 hai un bache de grandes dimensións, cunhas medidas de 1 metro de largo, 50cm de ancho e 15cm de profundidade, con aristas cortantes e que se encontraba sen sinalizar, motivo polo cal sufriron danos importantes as debanditas rodas”.