Otero e Mogo celebran a aprobación do trazado da A‑74 entre O Carme e Barreiros, cun investimento de 123 millóns

Subliñan que a A-74 representa unha aposta de primeira orde fronte á rebaixa da Xunta na variante de Viveiro

Lugo, 19 de xuño de 2026. A deputada do PSdeG no Congreso, Patricia Otero, e o senador por Lugo, César Mogo, celebraron hoxe a aprobación por parte do Ministerio de Transportes e Mobilidade Sostible do proxecto de trazado da Autovía A-74 da Mariña entre O Carme e Barreiros, cun orzamento estimado de máis de 123 millóns de euros.

“A aprobación deste proxecto supón un gran avance para unha actuación prioritaria para as e os socialistas lucenses”, subliñaron Otero e Mogo, que destacaron que a futura A-74 está chamada a dar continuidade á A-8 a través do corredor cantábrico da Mariña e a mellorar a conexión entre Barreiros e o porto de San Cibrao.

Patricia Otero, deputada socialista pola provincia de Lugo e membro da Comisión de Transportes do Congreso, cualificou a aprobación deste proxecto como “unha excelente noticia para A Mariña e para o conxunto da provincia”. “É unha excelente noticia para nós, as e os socialistas, porque falamos dunha infraestrutura estratéxica e prioritaria para o futuro da comarca”, sinalou.

Otero destacou que “a provincia de Lugo, durante os oito anos de Goberno de Pedro Sánchez, está a coñecer un desenvolvemento viario e ferroviario moi importante”. Neste sentido, incidiu en que “para as e os socialistas lucenses era unha prioridade” e que este avance supón “un salto adiante nunha infraestrutura fundamental para A Mariña e que xa non ten volta atrás”.

Pola súa banda, César Mogo puxo en contraste o avance impulsado polo Goberno de España coa falta de ambición da Xunta en proxectos estratéxicos para a comarca. O senador socialista subliñou que “este importante paso adiante convive co fiasco da variante de Viveiro, que a Xunta rebaixou de categoría desde unha vía de alta capacidade a unha estrada convencional”.

Mogo advertiu de que “A Mariña non se defende con investimentos de segunda orde, senón con investimentos de primeira categoría, como agora coñecemos coa Autovía da Mariña, que será unha realidade con este Goberno”.

O proxecto aprobado corresponde ao tramo entre O Carme e Barreiros, pertencente ao treito Foz-Barreiros. A actuación ten unha lonxitude aproximada de 6,57 quilómetros e permitirá deseñar un novo tramo da futura A-74, concibida como alternativa á N-642, estrada que discorre pola costa e que chega a acadar os 15.000 vehículos diarios no período estival.
Dende o PSdeG da provincia de Lugo conclúen que esta actuación evidencia “o enorme traballo que está a facer o Goberno de España para impulsar investimentos de primeira orde que permitan vertebrar a provincia de Lugo”.