Wedo Goás, muralista galego de referencia mundial, inicia en Cariño un proxecto de homenaxe á veciñanza

Cariño, 18 de agosto, 2026. Como explica o concelleiro de Cultura, Andrés Balado, o traballo que o artista fará no municipio buscará “render homenaxe a todas as persoas que contribuíron a crear a identidade e o legado do municipio”.

O muralista galego e gañador do Mellor Mural do Mundo 2025 do Street Art Cities, Wedo Goás, deixará a súa impronta artística en Cariño. En concreto, farao na rampla do Castro, onde o autor comezou xa a traballar nunha obra coa que se buscará un claro obxectivo: render homenaxe a todas as persoas que contribuíron a crear a identidade e o legado de Cariño. Así, como explica o concelleiro de Cultura, Andrés Balado, “con este traballo preténdese precisamente, manter viva parte da historia e das raíces que foron construíndo ao longo dos anos o noso orgullo e sentimento polo municipio”.

A confección desta peza realízase en colaboración coa Xunta de Galicia e constitúe o primeiro paso dun proxecto de futuro co que o goberno local pretende poñer en valor e transmitir diferentes capítulos da historia, a cultura e as tradicións de Cariño e da súa veciñanza.

Sobre o autor

Edgar Goás Blanco, máis coñecido como Wedo Goás, naceu no 1990 nas Pontes de García Rodríguez. Desde ben cativo amosou unha grande paixón polo debuxo, a pintura e o mundo artístico, que o levaron a formarse en diferentes escolas especializadas.

Ao longo da súa traxectoria participou nunha trintena de festivais de arte nacionais e internacionais e, no 2025, acadou o galardón como Mellor Mural do Mundo concedido por Street Art Cities co seu traballo As Mouras de Fene.