Ribadeo, 28 de xaneiro de 2020. Comezou en Ribadeo a xuntanza formativa do proxecto europeo Inclusión e Empregabilidade mediante a Tecnoloxía do Vehículo Eléctrico, que está a coordinar APAGA (Asociación de Profesores de Automoción de Galicia). Preto de 30 profesores de sete países danse cita no Centro Pedro Murias, procedentes de Romanía, Lituania, Italia, Portugal, Turquía, Croacia e diferentes puntos de España. Realizan actividades formativas, en horario de mañá e tarde, que compaxinarán con saídas para coñecer Ribadeo, á praia das Catedrais e Mondoñedo, entre outras localizacións da Mariña lucense.
A responsable do proxecto, Beatriz Fernández, explica que “estamos facendo o segundo encontro de formación do proxecto que estamos desenvolvendo este ano e o ano que ven, que se chama Inclusión e Empregabilidade mediante a Tecnoloxía do Vehículo Eléctrico. O que nos ocupa esta semana son dous aspectos da formación, un sobre o Passthur de todas as marcas de vehículos actuais, e outro sobre deseño 3D porque parte dos materiais que se van fabricar neste proxecto van incluír 3D máis toda a información na que se está a traballar agora co poñente que está dando a formación aos nosos compañeiros”.
Fernández Paredes contou que “estamos toda a semana en horario de mañá e de tarde, que se complementa con outro tipo de actividades nas que tamén imos progresando no traballo que se vai facendo no proxecto. Necesitamos consensuar moitas cousas e entón faise en horario de mañá a formación e pola tarde o traballo complementario”.
A responsable deste proxecto europeo engadiu que “estamos aquí representantes de sete países, aínda faltan algúns que se van ir incorporando, pero agora mesmo hai vinte persoas, máis case o equipo español ao completo. No proxecto en total son sete países e por cada país colaboran cinco dos profesionais de cada un dos centros que están implicados, que son expertos e especialistas na materia que estamos a traballar, así que somos un grupo de persoas bastante numeroso e coordinar a tanta xente non é moi fácil ás veces”.
Beatriz Fernández dixo que “en principio imos ter tres xuntanzas de formación, a primeira fixémola en Lisboa, a segunda estámola facendo aquí en Ribadeo, a terceira farémola no mes de marzo en Italia, e todo isto complementámolo con outras reunións transnacionais onde se progresa, se avanza, se corrixe e se matizan elementos do traballo final que temos que publicar. A vindeira xuntanza deste tipo vai ter lugar, no mes de maio, en Lisboa e despois proseguiremos no ano que ven con outros encontros. A idea final é darlle forma a un traballo bastante profesional dedicado ao alumnado da FP Básica, que é a formación profesional básica inicial, que é o noso obxectivo, proporcionar materiais sobre o vehículo eléctrico para ese tipo de alumnado”.
O presidente de APAGA, Álvaro Doural, sinalou que “as actividades complementarias veñen sendo un pouco parecidas ás que facemos cos grupos que veñen aquí a Ribadeo, visita ao Concello de Ribadeo, a lugares típicos como a praia das Catedrais e o porto de Rinlo, visita tamén a Mondoñedo, e imos ir a Taramundi. Dentro do marco no que se move a asociación, no seu proceso de internacionalización, este ano vai ser moi potente de actividades. Creo que se está facendo un traballo importante, cada vez máis xente se está incorporando á asociación, penso que imos por bo camiño”.
Para Doural “o tema Erasmus é un dos nosos buques estrela, está aportando moito, tanto para alumnos como profesores, e tamén para institucións e para os pobos. Creo que con iso tamén lle damos visibilidade á zona, A Mariña ou a outra zona onde van alumnos. Dentro duns días alumnos de Chantada estarán en Italia. Esperemos que esta xuntanza saia moi ben e que, a parte do traballo que se fai, isto forma moito grupo, a xente normalmente marcha de Ribadeo moi contenta e acostuma a volver”.
Os profesores que acoden a este encontro transnacional visitaron onte, luns, no municipio pontevedrés de Porriño o Centro Tecnolóxico de Automoción de Galicia e o Centro Tecnolóxico Aimen.
Ribadeo acolle a xuntanza formativa do proxecto europeo Inclusión e Empregabilidade mediante a tecnoloxía do vehículo eléctrico, que coordina APAGA
Relacionado
Durante case dúas horas desenvolveuse unha conversa aberta arredor do mundo do espírito e do contido da obra, nun encontro ao que asistiu un grupo numeroso de persoas dispostas non só a escoitar, senón tamén a dialogar e compartir reflexións. Tras a intervención inicial de Pepe Peinó como responsable do proxecto, tomou a palabra o escritor Lionel Rexes, quen achegou novas perspectivas antes de abrir o debate ao público. As opinións, argumentos e matices sobre relixión, espiritualidade, Deus e os valores que sustentan a convivencia foron enchendo o espazo nun ambiente participativo e respectuoso, no que as diferenzas quedaron en segundo plano fronte á forza do diálogo, a solidariedade e o afecto.
A iniciativa xurdiu co obxectivo de xuntar o alumnado que coincidira na EGB, pero axiña se ampliou a todas aquelas persoas que compartiron pupitres e amizades tamén no instituto.
O público, totalmente entregado de principio a fin, amosouno cos intensos e prolongados aplausos que acompañaron toda a actuación. Ao remate, os asistentes expresaron o seu desexo de poder gozar no futuro de novos concertos do artista, que sen dúbida volverán entusiasmar ao público.
Villares subliñou o éxito de convocatoria do evento, que reúne cada ano a numerosos participantes e afeccionados en Ribadeo, “aproveitando o atractivo da ría e do seu porto deportivo para atraer visitantes e complementar co deporte a súa ampla oferta de natureza, patrimonio e gastronomía”. A presente edición estivo dedicada á figura de Leopoldo Calvo-Sotelo, con motivo do centenario do nacemento do que fora presidente do Goberno e alcalde honorario do municipio. Ademais das regatas de vela en distintas categorías, celebráronse bautizos de buceo, charlas ou un concurso de pesca, entre outras actividades.
Na xuntanza preténdese analizar a execución das obras, o comportamento da empresa responsable, a problemática dos accesos durante as Festas de Xunqueira e solicitar ao Concello de Viveiro que faga público o proxecto definitivo.
A marcha partirá ás 12:30 horas diante do Concello, percorrerá as rúas peonís do centro e rematará novamente na casa consistorial, onde se lerá un manifesto. A plataforma chama a mobilizarse cunha mensaxe clara: cada bomba destrúe vidas e cada silencio convértenos en cómplices. Defenden que é o momento de saír á rúa para esixir o fin da violencia, o respecto aos dereitos humanos e a liberdade do pobo palestino, lembrando que a presenza das persoas manifestantes é a voz de quen hoxe non pode falar. A convocatoria péchase cun triplo chamamento: non á guerra, non ao silencio e non á indiferenza.
