Pablo Arangüena –PSdeG- acusa ao PP e ao goberno galego de “mentir para xerar inseguridade inxustificada coa normativa de costas por motivos electorais”

Muros, 18 de xuño de 2020. O vicesecretario xeral do PSdeG e cabeza de lista ás eleccións autonómicas por A Coruña, Pablo Arangüena, denunciou en Muros a “campaña de difamación e mentiras” artellada polo PP e o goberno galego en relación á normativa de costas, como vén de replicar hoxe mesmo o conselleiro de Presidencia, Alfonso Rueda. Así o dixo nun encontro coa militancia celebrado hoxe en Muros dirixido, explicou, a “desmontar as falacias vertidas polo PP contra o goberno”.

O responsable socialista explicou que, lonxe da versión do PP, “a única alusión á costa do Proxecto de Lei de Cambio Climático refírese a que as concesións teñen un prazo máximo de 75 anos, ademais de que nada impide a súa renovación unha vez esgotadas”. Criticou a “interpretación torticeira e disparatada dun artigo” do proxecto de leí por parte do PP e do goberno galego.

Criticou que “sen embargo omítese que a instancias do PSdeG o Ministerio comprometeuse a modificar a normativa de Costas da man do sector”. Ademais, engadiu, “comprometeuse explicitamente a favorecer de tódalas formas posibles o mantemento das explotacións económicas asociadas á costa de Galicia”.

Subliñou que, lonxe da “campaña de falacias artellada coa única intención de xerar incerteza e inseguridade”, o goberno “traballa para garantir a seguridade xurídica e física da actividade económica nas costas galegas. Arangüena citou á ministra de Transición Ecolóxica, que onte comprometeuse no Congreso a ter en conta á industria do mar e ao sector marítimo alimentario.

Campaña irresponsable

Dixo que os socialistas galegos, en sintonía co goberno de España, “defendemos ao sector marítimo pesqueiro de Galicia”, mentres o PP, da man do goberno galego, “leva dende 2019 facendo unha campaña irresponsable baseada en falsidades e buscando confrontar ao sector co goberno presidido por Pedro Sánchez”.

Explicou que “o goberno actúa conforme ao ditado pola Lexislación vixente en materia de concesións e prórrogas”, e lembra que a normativa foi precisamente aprobada durante o mandato do PP. Explicou que “o goberno abriuse a dialogar e incorporar perspectivas que poidan mellorar a realidade actual”.

Arangüena subliñou que “os socialistas galegos defendemos que tanto a aplicación actual como desenvolvementos futuros se fagan en consonancia coa nosa realidade marítimo – pesqueira e industrial”. Engadiu que “calquera desenvolvemento será feito sempre defendendo, posibilitando e potenciando aos noso sector marítimo-alimentario, que non é un problema medioambiental senón unha realidade social, económica e ata cultural”.

Acusou ao goberno galego e ao PP de “manter a súa estratexia de tentar enganar para xerar alarmismo na busca de réditos electorais”, e esixiulles “un mínimo de responsabilidade” para “eliminar dúbidas e deixar de facerlle dano ao noso sector marítimo – industrial e pesqueiro”.