A Mariña, 18 de xullo de 2020. Volve a encontrar o Norte é o nome da nova campaña que a Mancomunidade de Concellos de A Mariña Lucense lanza para axudar na promoción e reactivación turística do xeodestino co obxectivo de reducir o impacto que a crise sanitaria está tendo nesta comarca e tratar de seguir sendo unha opción nunha época na que os destinos nacionais gañan aínda mais peso dentro da oferta turística.
A campaña, que conta coa colaboración da Xunta de Galicia e da Deputación de Lugo, pretende reivindicar A Mariña Lucense como un xeodestino ubicado ao norte da provincia de Lugo, á beira do Mar Cantábrico no que o visitante pode atoparse a si mesmo e descubrir o seu Norte particular, despois duns meses nos que a sociedade tivo que soportar situacións de enorme tensión e incerteza a causa da crise da Covid-19, e máis aínda, nas últimas semanas no distrito sanitario da Mariña Lucense.
O presidente da Mancomunidade, Fran Cajoto, na presentación desta acción dixo que “é unha campaña de promoción turística realmente do que temos. Sen enganar a ninguén destacar unha zona na que o turismo non está masificado, onde podemos desfrutar da natureza, da boa gastronomía, da tranquilidade dos paseos, dunhas marabillosas praias, dun interior tamén con grandes monumentos arquitectónicos”.
Para Cajoto “A Mariña é unha zona para descubrir e penso que o lema da campaña é o idóneo, Volve encontrar o norte-Vuelve a encontrar el norte, despois dunha época difícil que pasamos na que tivemos que permanecer nos nosos fogares, redescubrir a sensación de liberdade, un espazo no que podemos respirar, e desde logo a nosa referencia é o norte. A costa de Lugo, A Mariña lucense, somos o norte por excelencia. O que pretendemos agora é animar a todo o mundo a que nos veña ver, non por nada en especial senón polo que xa tíñamos demostrado e que todos os visitantes nos poidan descubrir ou redescubrir que moitos ou a gran maioría dos que veñen, volven aquí. Así que estamos desexando que funcione para que o sector turístico de toda a comarca pouco a pouco recobre a normalidade, é fundamental na nosa Mariña que os hoteis, os restaurantes e os bares volvan vivir tamén e teñan ese rédito dunha época fabulosa que hai aquí como é o verán”.
A Mariña Lucense ofrece ao visitante liberarse da experiencia desagradable que supuxo o confinamento e deixar atrás as malas novas recibidas no que vai de ano. O xeodestino dálle a posibilidade de afastarse do estrés do día a día, grazas a unha proposta baseada no turismo slow, un xeito sostible de viaxar, que aposta por destinos illados e evita as masificacións para dar prioridade á experiencia do viaxeiro.
Os concellos integrantes do xeodestino conforman un itinerario no que poder reconectar cun mesmo a través de paisaxes salvaxes, con praias paradisíacas e costas agrestes encravadas en pleno norte peninsular, a zona que o visitante leva tempo querendo atopar. Alí pode descubrir un enorme mundo baixo o mar, nunha zona de grande riqueza pesqueira e marisqueira; unha gastronomía que aproveita ese produto de primeira para elaborar pratos sorprendentes; e unha cultura que se demostra coñecendo o seu patrimonio, a hospitalidade das súas xentes e a calidade da súa artesanía. Todo un paseo polo Norte, para coñecelo a fondo e non volver perdelo nunca.
Na presentación da campaña participaron o presidente da Mancomunidade, Fran Cajoto, a xerente de Turismo da entidade, Tania Hermida, e o presidente da FCAM, José Carlos Paleo.
Máis información:
/amarinalucense.turismo
@amarina_turismo
@visitamarinalucense
Volve a encontrar o Norte é o nome da nova campaña que a Mancomunidade lanza para axudar na promoción e reactivación turística
Relacionado
Durante case dúas horas desenvolveuse unha conversa aberta arredor do mundo do espírito e do contido da obra, nun encontro ao que asistiu un grupo numeroso de persoas dispostas non só a escoitar, senón tamén a dialogar e compartir reflexións. Tras a intervención inicial de Pepe Peinó como responsable do proxecto, tomou a palabra o escritor Lionel Rexes, quen achegou novas perspectivas antes de abrir o debate ao público. As opinións, argumentos e matices sobre relixión, espiritualidade, Deus e os valores que sustentan a convivencia foron enchendo o espazo nun ambiente participativo e respectuoso, no que as diferenzas quedaron en segundo plano fronte á forza do diálogo, a solidariedade e o afecto.
A iniciativa xurdiu co obxectivo de xuntar o alumnado que coincidira na EGB, pero axiña se ampliou a todas aquelas persoas que compartiron pupitres e amizades tamén no instituto.
O público, totalmente entregado de principio a fin, amosouno cos intensos e prolongados aplausos que acompañaron toda a actuación. Ao remate, os asistentes expresaron o seu desexo de poder gozar no futuro de novos concertos do artista, que sen dúbida volverán entusiasmar ao público.
Villares subliñou o éxito de convocatoria do evento, que reúne cada ano a numerosos participantes e afeccionados en Ribadeo, “aproveitando o atractivo da ría e do seu porto deportivo para atraer visitantes e complementar co deporte a súa ampla oferta de natureza, patrimonio e gastronomía”. A presente edición estivo dedicada á figura de Leopoldo Calvo-Sotelo, con motivo do centenario do nacemento do que fora presidente do Goberno e alcalde honorario do municipio. Ademais das regatas de vela en distintas categorías, celebráronse bautizos de buceo, charlas ou un concurso de pesca, entre outras actividades.
Na xuntanza preténdese analizar a execución das obras, o comportamento da empresa responsable, a problemática dos accesos durante as Festas de Xunqueira e solicitar ao Concello de Viveiro que faga público o proxecto definitivo.
A marcha partirá ás 12:30 horas diante do Concello, percorrerá as rúas peonís do centro e rematará novamente na casa consistorial, onde se lerá un manifesto. A plataforma chama a mobilizarse cunha mensaxe clara: cada bomba destrúe vidas e cada silencio convértenos en cómplices. Defenden que é o momento de saír á rúa para esixir o fin da violencia, o respecto aos dereitos humanos e a liberdade do pobo palestino, lembrando que a presenza das persoas manifestantes é a voz de quen hoxe non pode falar. A convocatoria péchase cun triplo chamamento: non á guerra, non ao silencio e non á indiferenza.
