Lugo, 17 de setembro de 2020. O Presidente da Deputación de Lugo, José Tomé Roca, participou este xoves na conferencia de alcaldes e presidentes provinciais que organizou o Eixo Atlántico no Teatro Principal de Pontevedra co fin de abordar as fórmulas de recuperación socioeconómica fronte á crise provocada pola pandemia da Covid-19 e, en concreto, as accións necesarias para financiar cos fondos europeos para a reconstrución.
Durante o encontro, ao que asistiron unha trintena de alcaldes e alcaldesas da eurorrexión Galicia-Norte de Portugal, José Tomé subliñou que estes recursos da UE só serán realmente efectivos se a súa distribución atende á realidade demográfica e ás características do territorio, algo para o que resulta fundamental o papel das deputacións. Deste xeito, o Presidente destacou que reforzará o liderado da Deputación de Lugo na captación e xestión do financiamento europeo para que chegue aos municipios máis pequenos pois estes, debido ás súas características técnicas, de persoal ou económicas, teñen difícil acceso.
Neste senso, o Presidente expuxo a necesidade de impulsar proxectos europeos “dende unha visión estratéxica do país, pegados á realidade, que nos axuden a aproveitar e desenvolver as potencialidades da provincia e que contribúan a saír reforzados da crise socioeconómica e sen deixar a ninguén atrás”.
Tendo en conta as particularidades da provincia de Lugo e o papel de liderado e de cooperación cos concellos que quere seguir xogando a Deputación de Lugo, José Tomé compartiu co resto de autoridades e expertos as liñas estratéxicas de actuación que propón para financiar cos fondos europeos de reconstrución, baseadas nunha recuperación transversal que aposte polo equilibrio do territorio. Son as seguintes:
1. Desenvolvemento dun plan de reactivación do emprego e da actividade económica. “Especialmente dirixido ás PEMES e aos autónomos; á industria, tanto para recuperar a que se viu afectada pola crise como para impulsar novos modelos produtivos; e, sobre todo, ao sector primario, a través de xeración de valor engadido, da diversificación e da comercialización de produtos de proximidade”, explicou o Presidente.
2. Posta en marcha dun programa de cobertura dixital a través de infraestruturas tecnolóxicas avanzadas. “Especialmente no medio rural e nas zonas de sombra existentes na actualidade co obxectivo de garantir a igualdade de oportunidades, reducir a fenda dixital e facilitar a todas as persoas o dereito universal de acceso a Internet”, subliñou Tomé Roca.
3. A promoción do territorio ligado ao turismo. “É unha oportunidade para saír fortalecidos da crise. A aposta por un turismo de calidade, sostible no tempo e vinculado á paisaxe, á gastronomía e á cultura ten que ser un eixo dun plan de actuación transversal que, ao mesmo tempo, debe promover a mellora das comunicación da rede viaria local para facilitar a mobilidade entre as diferentes zonas singulares da provincia”, explicou o Presidente.
4. Plan de saneamento colectivo para os núcleos que carezan desta dotación pública básica. Tomé Roca explicou que “a dispersión poboacional da nosa provincia é unha realidade, e nin se pode medir en termos económicos, nin pode ser unha escusa para non dotar con infraestruturas básicas aos núcleos rurais”.
5. Actuacións decididas para a protección, rexeneración e aproveitamento sostible dos recursos naturais singulares da provincia de Lugo. “Deben estar apoiadas na concienciación e nunha actuación directa na promoción e a implantación das enerxías limpas en todas as fases dos procesos produtivos”, indicou o Presidente.
6. Impulso dunha estratexia real para facer fronte ao reto demográfico, ó despoboamento e ó progresivo envellecemento da poboación. Para elo, “é preciso complementar a actual rede de servizos públicos sociosanitarios de proximidade existente na provincia”, afirmou Tomé Roca.
Os servizos sanitarios trasladaron ao hospital a tres persoas implicadas nunha colisión frontal en Castro de Rei. Unha delas tivo que ser excarcerada polos Bombeiros de Vilalba. Contra as 11:15 horas, un particular informou ao 112 Galicia dun choque entre dous vehículos no quilómetro 71 da N-640, á altura da parroquia de Viladonga. Desde o punto, os alertadores sinalaron que unha persoa permanecía atrapada. Desde o Centro Integrado de Atención ás Emerxencias activouse un operativo no que participaron Urxencias Sanitarias de Galicia-061, a Garda Civil de Tráfico, os Bombeiros de Vilalba e os servizos de mantemento da estrada. Os bombeiros liberaron á persoa, que foi trasladada xunto con outros dous feridos ao hospital en ambulancia.
A viaxe, enmarcada no proxecto «Relevo Xeracional: O Futuro do Mar» e organizada en colaboración co GALP Itsas Garapen Elkartea, permitiu achegarse a iniciativas como Kofradia Basque Seafood, a Escola de Pesca de Ondarroa, AZTI, Albaola ou o Itsas Museo de Donosti, así como a proxectos vinculados directamente á actividade pesqueira e á divulgación, incluíndo o uso de realidade virtual. O intercambio con Euskadi permitiu coñecer modelos que combinan formación, investigación, transmisión do coñecemento e modernización do sector, contribuíndo a identificar novas vías para facilitar a incorporación da mocidade á actividade pesqueira e garantir a continuidade das comunidades costeiras galegas.
A artista, referente da música popular galega, conectou cun público diverso que gozou dunha sesión vermú marcada por máis de trinta anos de traxectoria. O concerto serviu tamén como despedida e recoñecemento a Valentín González e Viviana Pérez, que deixan a organización da comisión de festas tras dúas décadas. O deputado de Mocidade, Daniel García, destacou a importancia da implicación veciñal para manter vivas as celebracións que fortalecen a identidade comunitaria e reafirmou o apoio da Deputación ás redes asociativas e á programación cultural en galego. A actuación forma parte da iniciativa provincial para achegar música tradicional e en galego a todos os públicos.
Cómpre sinalar que este produto conta cun distintivo de calidade diferenciada, a Indicación Xeográfica Protexida Faba de Lourenzá, un dos 36 selos recoñecidos en Galicia que amparan a súa excelencia. Neste sentido, a Xunta vén de lanzar a nova marca Aquí Sabemos, coa que se busca reforzar o coñecemento e a identificación por parte dos consumidores dos produtos alimentarios galegos protexidos por figuras de calidade diferenciada.
Co sol ocultándose e a lúa asomando entre as torres de Donlebún, o músico e divulgador reivindicou o poder evocador e transformador do bravú fronte á morriña paralizante. Na sala de lectura da biblioteca, Souto explicou a evolución do rock bravú no imaxinario galego, evocando as músicas populares que acompañaron durante décadas os remolques dos pascualiños e os labores comunitarios, e lembrando a vitalidade de grupos como Skornabois, Diplomáticos de Monte Alto, Xenreira, Zënzar, Pinto de Herbón ou os Rastreiros. A boa lembranza da súa anterior visita levou ao artista a pechar a velada interpretando o “Himno de Ribadeo”, composto por Arturo Mogo, nun final cheo de afecto pola vila e pola súa identidade cultural.
O evento ofrecerá mel, produtos de tempada, artesanía, gastronomía e outras propostas locais. O Concello do Valadouro mantén aberto o prazo de inscrición para persoas e empresas expositoras, que poden presentar a súa solicitude na sede electrónica ou nas oficinas do Centro Socio-cultural, Xuvenil e da Terceira Idade “Manuel Lourenzo” ata o martes 6 de outubro, ou ata completar os postos dispoñibles.
Neste espazo radiofónico Félix Jorquera falou coa alcaldesa de Lourenzá, Rocío López; co concelleiro de Cultura, Manuel Arango; con José Cuadrado, presidente da Indicación Xeográfica Protexida Faba de Lourenzá e pregoeiro desta edición da festa; co chef Pedro Barreira; e con Antonio Irimia, presidente do club VespaFaba & Clásicos, de Lourenzá. Por diante queda toda unha fin de semana chea de actividades arredor da faba de Lourenzá. Os organizadores animan a acudir a esta cita.