Lugo, a 17 de outubro de 2020. O grupo provincial popular pide ao presidente da Deputación que inicie a tramitación para o orzamento provincial correspondente ao 2021 e ofrece, coa mellor vontade, a colaboración dos seus deputados para sacar adiante o plan económico anual, no que teñan especial peso a promoción do emprego e un plan de estradas. O portavoz popular, Javier Castiñeira, sinala: “Os doce deputados do grupo popular ofrecémonos ao goberno da Deputación para empezar a traballar o antes posible nos orzamentos do ano 2021, que serán importantísimos para a provincia de Lugo nun momento moi complexo, no que todos debemos estar unidos e loitando polo mesmo fin”.
Castiñeira di: “O presidente da Deputación ten unha grande oportunidade de conseguir aprobar o presuposto por unanimidade do pleno e pódeo lograr se tende a man ao PP. Pola nosa parte non vai ter ningún problema. Temos que empezar a traballar dende xa; sería estupenda unha unanimidade neses orzamentos do 2021. Polo Partido Popular non vai faltar vontade para tratar de conseguilo. Para elo ten que empezar a traballar dende o primeiro momento, dende xa, para que os orzamentos estean aprobados a finais deste ano e non a finais do primeiro trimestre ou principios do segundo do 2021”. O portavoz provincial pon un exemplo de que os orzamentos débense aprobar canto antes, como fan outras deputacións, como a de Ourense, “da que temos que aprender neste sentido e iniciar o exercicio cos orzamentos xa aprobados”.
Arrancar o próximo ano tendo xa listo o plan económico é, indica Castiñeira, “moi importante para os concellos, porque supón para eles poder aproveitar dende o principio todos os planes que iso implica”. Expón o seu convencemento de que “o podemos facer e sería moi interesante para toda a provincia; para elo hai que convocar o máis pronto posible á xunta de portavoces ou á comisión de economía, o que o presidente considere máis adecuado, pero temos que empezar a falar de orzamentos”.
Castiñeira destaca: “O PP entende que é prioritario falar de estradas, dun plan de estradas. Temos unha das redes de estradas máis grandes do Estado, con 4.200 quilómetros, e cremos que é o momento de deseñar un plan e tratar de mantelas debidamente, porque en moitos concellos hai vías provinciais en moi mal estado. Tamén temos que combater esta crise con emprego, fomentando o emprego e axudando aos emprendedores lucenses”.
Os populares queren sumar e animan ao presidente da Deputación “a conseguir ese pleno de 25 votos que sería moi positivo para toda a provincia”. Castiñeira di: “Chámenos, estamos a súa disposición. Nós imos defender dous temas que cremos necesarios: un é o fomento do emprego, nun ano crucial para a provincia, un ano no que temos que saír desta crise que está causando a covid-19; o outro é a mellora das estradas. Temos que desenvolver un plan de estradas continuo para manter esa rede que crearon no seu días gobernos do PP e que vertebra a nosa provincia; é fundamental para o desenvolvemento do rural”.
Castiñeira resume: “Emprego e estradas, aí nos atopará señor presidente; aproveite a boa vontade do PP. Está nas súas mans conseguir un acordo unánime, 25 deputados votando a favor dos orzamento para o 2021, sería un éxito do goberno, pero, sen dúbida algunha, un éxito de toda a corporación”.
Os servizos sanitarios trasladaron ao hospital a tres persoas implicadas nunha colisión frontal en Castro de Rei. Unha delas tivo que ser excarcerada polos Bombeiros de Vilalba. Contra as 11:15 horas, un particular informou ao 112 Galicia dun choque entre dous vehículos no quilómetro 71 da N-640, á altura da parroquia de Viladonga. Desde o punto, os alertadores sinalaron que unha persoa permanecía atrapada. Desde o Centro Integrado de Atención ás Emerxencias activouse un operativo no que participaron Urxencias Sanitarias de Galicia-061, a Garda Civil de Tráfico, os Bombeiros de Vilalba e os servizos de mantemento da estrada. Os bombeiros liberaron á persoa, que foi trasladada xunto con outros dous feridos ao hospital en ambulancia.
A viaxe, enmarcada no proxecto «Relevo Xeracional: O Futuro do Mar» e organizada en colaboración co GALP Itsas Garapen Elkartea, permitiu achegarse a iniciativas como Kofradia Basque Seafood, a Escola de Pesca de Ondarroa, AZTI, Albaola ou o Itsas Museo de Donosti, así como a proxectos vinculados directamente á actividade pesqueira e á divulgación, incluíndo o uso de realidade virtual. O intercambio con Euskadi permitiu coñecer modelos que combinan formación, investigación, transmisión do coñecemento e modernización do sector, contribuíndo a identificar novas vías para facilitar a incorporación da mocidade á actividade pesqueira e garantir a continuidade das comunidades costeiras galegas.
A artista, referente da música popular galega, conectou cun público diverso que gozou dunha sesión vermú marcada por máis de trinta anos de traxectoria. O concerto serviu tamén como despedida e recoñecemento a Valentín González e Viviana Pérez, que deixan a organización da comisión de festas tras dúas décadas. O deputado de Mocidade, Daniel García, destacou a importancia da implicación veciñal para manter vivas as celebracións que fortalecen a identidade comunitaria e reafirmou o apoio da Deputación ás redes asociativas e á programación cultural en galego. A actuación forma parte da iniciativa provincial para achegar música tradicional e en galego a todos os públicos.
Cómpre sinalar que este produto conta cun distintivo de calidade diferenciada, a Indicación Xeográfica Protexida Faba de Lourenzá, un dos 36 selos recoñecidos en Galicia que amparan a súa excelencia. Neste sentido, a Xunta vén de lanzar a nova marca Aquí Sabemos, coa que se busca reforzar o coñecemento e a identificación por parte dos consumidores dos produtos alimentarios galegos protexidos por figuras de calidade diferenciada.
Co sol ocultándose e a lúa asomando entre as torres de Donlebún, o músico e divulgador reivindicou o poder evocador e transformador do bravú fronte á morriña paralizante. Na sala de lectura da biblioteca, Souto explicou a evolución do rock bravú no imaxinario galego, evocando as músicas populares que acompañaron durante décadas os remolques dos pascualiños e os labores comunitarios, e lembrando a vitalidade de grupos como Skornabois, Diplomáticos de Monte Alto, Xenreira, Zënzar, Pinto de Herbón ou os Rastreiros. A boa lembranza da súa anterior visita levou ao artista a pechar a velada interpretando o “Himno de Ribadeo”, composto por Arturo Mogo, nun final cheo de afecto pola vila e pola súa identidade cultural.
O evento ofrecerá mel, produtos de tempada, artesanía, gastronomía e outras propostas locais. O Concello do Valadouro mantén aberto o prazo de inscrición para persoas e empresas expositoras, que poden presentar a súa solicitude na sede electrónica ou nas oficinas do Centro Socio-cultural, Xuvenil e da Terceira Idade “Manuel Lourenzo” ata o martes 6 de outubro, ou ata completar os postos dispoñibles.
Neste espazo radiofónico Félix Jorquera falou coa alcaldesa de Lourenzá, Rocío López; co concelleiro de Cultura, Manuel Arango; con José Cuadrado, presidente da Indicación Xeográfica Protexida Faba de Lourenzá e pregoeiro desta edición da festa; co chef Pedro Barreira; e con Antonio Irimia, presidente do club VespaFaba & Clásicos, de Lourenzá. Por diante queda toda unha fin de semana chea de actividades arredor da faba de Lourenzá. Os organizadores animan a acudir a esta cita.