Burela, 10 de abril, 2021. As burelistas continúan imparables no seu camiño cara ao play off, coa terceira de tres. O Pescados Rubén Burela FS conseguiu impoñerse esta mañá nunha das pistas máis complicadas da elite, a de STV Roldán FSF (3-5), con traballo e entrega, nunha semana con mingua de efectivos. Tras o gol madrugador das murcianas, o conxunto galego soubo como reaccionar fronte a un rival moi intenso e combativo, que devolveu o empate no inicio da segunda parte, con 2-2, e non deixou de xerar perigo. As Guerreiras Laranxas demostraron unha vez máis que o equipo segue medrando.
O Clásico, en Vista Alegre
O Pescados Rubén recibirá a Futsi Atlético Navalcarnero o vindeiro sábado, 17 de abril, no Clásico de Primeira, ás 18.30 horas. Vista Alegre abrirá a taquilla con 50 entradas (15 euros/público xeral e 10 euros/ soci@s sen abono. Imprescindible presentar DNI).
As pupilas de Julio Delgado tiveron que remar contra o electrónico. A iniciativa murciana chegou aos 14 segundos de xogo, cun saque de esquina culminado por Alba Gandía. As Guerreiras responderon ben e despregaron o seu particular bulebule para ir apropiándose do esférico e das ocasións. Ale de Paz asinou o 1-1, no minuto 5, nun córner de Peque materializado pola de Neda sen contemplacións. Roldán tentou facer fronte ao despregamento burelista cunha defensa alta para incomodar as saídas galegas. Tivo Pescados Rubén os seus mellores minutos en ofensiva despois da medianía do primeiro acto con Lara Balseiro, Bea Mateos e Dany; Ale de Paz a punto estivo de repetir xesta sobre a rede fronte á boa resposta de Cristina cos pés. Roldán, exemplo de intensidade durante os corenta minutos, suspirou pola vantaxe no minuto 15, nunha tentativa de Lola á que non puido chegar Noelia ao segundo pau, con resposta de vertixe entre Peque e Jane. Antes do descanso, as burelistas atoparon o premio merecido nunha perda de Lola que cazou Dany para cederlla a Leti (minuto 18).
O conxunto de Juan Alcaraz volveu á pista para dar continuidade ao perigo xerado por Andrea antes da bucina, ver portería e poñer táboas, de novo con Alba Gandía (minuto 23), fronte a Jozi, e respondeu Pescados Rubén con outra boa dose de perigo. Dany non puido controlar o pase de Peque fronte á rede local pero acto seguido a nedense, Ale de Paz, non errou para selar o terceiro, apoiándose na capitá laranxa. Volveu avisar a 17 burelista en contragolpe. Dispuxeron das mellores as murcianas sobre o ecuador do segundo acto, con Alba Gandía nun disparo afastado cruzado que rozou o pau e Jozi freou a Noelia. Aproveitou entón o conxunto galego para ampliar distancias con Lara Balseiro en galopada pola banda, mitigada nos seguintes compases por Marta Pelegrín. Tras o perigo protagonizado de novo por Ale de Paz, Roldán apostou por xogo de cinco con máis de tres minutos por diante. Peque non puido dar máis comodidade ao resultado transformando o penalti tras a falta sobre Ale de Paz, pero pouco despois Jane subiu o quinto nunha gran saída con perfecta definición para aferrarse aos tres puntos.
Ficha técnica
STV Roldán FSF: Cristina, Alba Gandía, Noelia Montoro, Mariángeles, Ángela, cinco inicial; tamén xogaron Lola, Marta Pelegrín, Marta, Consuelo, Cristina Sánchez
Pescados Rubén Burela FS: Sandra Buzón, Dany, Peque, Lara Balseiro, Bea Mateos, cinco inicial; tamén xogaron Ale de Paz, Leti, Jane, Elena Aragón, Jozi Oliveira
Goles: 1-0, minuto 1, Alba Gandía; 1-1, minuto 5, Ale de Paz; 1-2, minuto 18, M. Cortés; 2-2, minuto 23, Alba Gandía; 2-3, minuto 24, Ale de Paz; 2-4, minuto 35, Lara Balseiro; 3-4, minuto 35, Marta Pelegrín; 3-5, minuto 39, Jane
Árbitros: Hidalgo Marín // Martínez Martínez. Por Roldán amarela para Marta, Cristina. Por Burela amarela para Lara Balseiro, Julio Delgado.
Incidencias: Partido correspondente á xornada 3 (segunda fase) de Primeira División disputado no municipal Gabriel Pérez Sánchez.
Os servizos sanitarios trasladaron ao hospital a tres persoas implicadas nunha colisión frontal en Castro de Rei. Unha delas tivo que ser excarcerada polos Bombeiros de Vilalba. Contra as 11:15 horas, un particular informou ao 112 Galicia dun choque entre dous vehículos no quilómetro 71 da N-640, á altura da parroquia de Viladonga. Desde o punto, os alertadores sinalaron que unha persoa permanecía atrapada. Desde o Centro Integrado de Atención ás Emerxencias activouse un operativo no que participaron Urxencias Sanitarias de Galicia-061, a Garda Civil de Tráfico, os Bombeiros de Vilalba e os servizos de mantemento da estrada. Os bombeiros liberaron á persoa, que foi trasladada xunto con outros dous feridos ao hospital en ambulancia.
A viaxe, enmarcada no proxecto «Relevo Xeracional: O Futuro do Mar» e organizada en colaboración co GALP Itsas Garapen Elkartea, permitiu achegarse a iniciativas como Kofradia Basque Seafood, a Escola de Pesca de Ondarroa, AZTI, Albaola ou o Itsas Museo de Donosti, así como a proxectos vinculados directamente á actividade pesqueira e á divulgación, incluíndo o uso de realidade virtual. O intercambio con Euskadi permitiu coñecer modelos que combinan formación, investigación, transmisión do coñecemento e modernización do sector, contribuíndo a identificar novas vías para facilitar a incorporación da mocidade á actividade pesqueira e garantir a continuidade das comunidades costeiras galegas.
A artista, referente da música popular galega, conectou cun público diverso que gozou dunha sesión vermú marcada por máis de trinta anos de traxectoria. O concerto serviu tamén como despedida e recoñecemento a Valentín González e Viviana Pérez, que deixan a organización da comisión de festas tras dúas décadas. O deputado de Mocidade, Daniel García, destacou a importancia da implicación veciñal para manter vivas as celebracións que fortalecen a identidade comunitaria e reafirmou o apoio da Deputación ás redes asociativas e á programación cultural en galego. A actuación forma parte da iniciativa provincial para achegar música tradicional e en galego a todos os públicos.
Cómpre sinalar que este produto conta cun distintivo de calidade diferenciada, a Indicación Xeográfica Protexida Faba de Lourenzá, un dos 36 selos recoñecidos en Galicia que amparan a súa excelencia. Neste sentido, a Xunta vén de lanzar a nova marca Aquí Sabemos, coa que se busca reforzar o coñecemento e a identificación por parte dos consumidores dos produtos alimentarios galegos protexidos por figuras de calidade diferenciada.
Co sol ocultándose e a lúa asomando entre as torres de Donlebún, o músico e divulgador reivindicou o poder evocador e transformador do bravú fronte á morriña paralizante. Na sala de lectura da biblioteca, Souto explicou a evolución do rock bravú no imaxinario galego, evocando as músicas populares que acompañaron durante décadas os remolques dos pascualiños e os labores comunitarios, e lembrando a vitalidade de grupos como Skornabois, Diplomáticos de Monte Alto, Xenreira, Zënzar, Pinto de Herbón ou os Rastreiros. A boa lembranza da súa anterior visita levou ao artista a pechar a velada interpretando o “Himno de Ribadeo”, composto por Arturo Mogo, nun final cheo de afecto pola vila e pola súa identidade cultural.
O evento ofrecerá mel, produtos de tempada, artesanía, gastronomía e outras propostas locais. O Concello do Valadouro mantén aberto o prazo de inscrición para persoas e empresas expositoras, que poden presentar a súa solicitude na sede electrónica ou nas oficinas do Centro Socio-cultural, Xuvenil e da Terceira Idade “Manuel Lourenzo” ata o martes 6 de outubro, ou ata completar os postos dispoñibles.
Neste espazo radiofónico Félix Jorquera falou coa alcaldesa de Lourenzá, Rocío López; co concelleiro de Cultura, Manuel Arango; con José Cuadrado, presidente da Indicación Xeográfica Protexida Faba de Lourenzá e pregoeiro desta edición da festa; co chef Pedro Barreira; e con Antonio Irimia, presidente do club VespaFaba & Clásicos, de Lourenzá. Por diante queda toda unha fin de semana chea de actividades arredor da faba de Lourenzá. Os organizadores animan a acudir a esta cita.