A Xunta inviste preto de 30.000€ na mellora da escola infantil pública de Ribadeo

Mellorouse o muro exterior do centro e renováronse dúas aulas

Ribadeo, 5 de decembro de 2023. O director xeral de Familia, Infancia e Dinamización Demográfica, Jacobo Rey, visitou hoxe as actuacións de mellora que se realizan na escola infantil pública ‘Nosa Señora do Campo’, en Ribadeo, ás que se destinan preto de 30.000 euros. Nesta visita tamén participou o alcalde do concello, Daniel Vega.

Ata o de agora xa se actuou na mellora do muro exterior do centro e, ademais, renováronse dúas aulas para facelas máis confortables para os alumnos. O director xeral avanzou que tamén se instalará unha zona cuberta para que os pais poidan deixar os carriños dos seus fillos ao chegar á escola.

Ademais, a petición do alcalde, a Xunta continuará analizando en 2024 outras melloras a realizar na escola, que dispón de sete unidades e 107 prazas de 0 a 3 anos.

O alcalde, Daniel Vega, fai unha valoración positiva da visita cursada á escola infantil por parte do director xeral de Familia, Infancia e Dinamización Demográfica, Jacobo Rey.

O rexedor dixo que “foron 30.000 euros de inversión para remodelar a escola infantil. A dirección do centro solicitounos a colaboración para que xestionáramos ante a Xunta ese investimento. Actuouse en dúas aulas, que foron remodeladas. Cambiamos os solos, xa que non cumprían a normativa, e agora xa están modificados. Agora as aulas, que contan con solos vinílicos, tamén foron pintadas. E remodelamos o muro exterior, o que da ao aparcadoiro da rúa do Pipelo”.

Vega explicou que “na xuntanza que mantivemos co director xeral de Familia o que fixemos foi xestionar outros 15.000 euros. Con esa partida actuaremos no acceso á escola infantil. Alí vaise botar formigón e tamén se mellorará a zona onde se aparcan os carriños dos bebés”.

Para o alcalde “é moi importante traballar e xestionar orzamento porque é moi necesario investir nos edificios públicos, no ensino público e desde logo na nosa escola infantil”.