Pontón reclámalle a Rueda que desista do seu papel de comercial de Altri e defenda os fondos europeos para o rural

Advirte que a macrocelulosa contaminaría o territorio e destruiría miles de empregos, como revela o Consello da Cultura no seu demoledor informe

Santiago de Compostela, 20 setembro 2024. A portavoz nacional, Ana Pontón, reclamoulle dende Arzúa ao presidente da Xunta, Alfonso Rueda, e ao seu Executivo que “deixen de facer de comerciais de Altri, sexan “leais co País” e “defendan os intereses das galegas e dos galegos”.

Pontón instou a Rueda a parar a “bomba ambiental” da macrocelulosa e a que os 250 millóns de euros de fondos europeos “que queren darlle a unha multinacional portuguesa para que faga aquí o que non lle deixan en Portugal”, recalcou, sexan destinados a reactivar o rural, a recuperar o río Ulla ou a sanear a Ría de Arousa, tamén ameazada polo proxecto.

A líder nacionalista advertiu do perigo que supón Altri dende Arzúa, onde visitou xunto ao alcalde da localidade, Xoán Xesús Carril, Queixos Verbas, unha explotación gandeira en ecolóxico que produce queixos de máxima calidade apostando pola innovación e que puxo como exemplo dos proxectos nos que habería que investir eses fondos europeos.

“Un proxecto desenvolvido dende a comarca de Arzúa-Ulloa, unha das comarcas máis produtivas de Galiza, con miles de explotacións gandeiras e cunha das Denominacións de Orixe máis produtivas de todo o Estado”, subliñou para poñer en valor a riqueza dunha comarca onde o sector agrogandeiro e leiteiro non só é clave para fixar poboación, xerar riqueza e miles de empregos, senón que tamén contribúe a manter un medio rural vivo e a ter un territorio produtivo en lugar de estar abandonado.

Por iso, advertiu da ameaza que supón “a aposta do Partido Popular de instalar unha macrocelulosa no corazón do rural galego”, contaminando o medio ambiente, o río Ulla e poñendo en risco miles de empregos non só na comarca da Ulloa, senón tamén na desembocadura do río na Ría de Arousa.

“Fronte a esa presa de postos de traballo que promete a multinacional, o que sabemos é que a suma do sector agrario nesta comarca e o que representa o sector da Ría de Arousa ascende a 8.000 empregos”, afondou Pontón, quen recalcou que isto é o que “Altri está poñendo en perigo co patrocinio do Partido Popular”.

Neste sentido, recordou o “contundente” informe do Consello da Cultura Galega denunciando que a macrocelulosa suporía unha fractura do territorio, prexudicaría a moitas actividades económicas que xa existen, fundamentalmente ás vinculadas coa actividade agrogandeira.

De igual xeito, lembrou que a comarca conta nestes momentos cunhas 3.000 explotacións agrogandeiras cunha superficie agraria moi cativa (sobre as 61.000 hectáreas), polo que Altri dificultaría aínda máis que acadaran máis superficie agraria útil.

“Toda esta actividade agraria e esta Denominación de Orixe que é un valor para o futuro desenvolvemento do País non podemos poñela en risco única e exclusivamente porque vemos como o PP está traballando para as multinacionais, en vez de estar defendendo os intereses dos galegos e das galegas”, recriminou.

A portavoz nacional tamén alertou de que, ademais de quitarlle á xente do rural o seu medio de vida, a macrocelulosa suporía “eucaliptizar máis Galiza”, poñendo en risco aínda máis o territorio e ignorando a crise climática.

Por todo isto, insistiu en reclamarlle ao Goberno do PP que deixe de patrocinar un proxecto prexudicial para o País e traballe para que os fondos europeos que pretende darlle á multinacional portuguesa sirvan para dinamizar o rural e impulsar o desenvolvemento do País.

“Porque eses 250 millóns de euros, ben investidos, van xerar miles de postos de traballo”, indicou para concluír a continuación que o que non se pode permitir é que “toda a riqueza e actividade que hai neste momento nesta comarca se poña en risco polos intereses dunha multinacional”.