O Concello de Cervo apoia economicamente á Asociación Saúde Mental A Mariña poñendo en valor un labor extraordinario en beneficio da comunidade

A alcaldesa vén de asinar coa entidade un convenio que supón unha axuda de 20.000 euros “co obxectivo de contribuír a que poidan manter a calidade do servizo que prestan, fortalecendo as iniciativas que teñen en marcha, e creando novas oportunidades para as persoas que o precisan”

Cervo, 15 de outubro de 2024. O Concello de Cervo colabora economicamente coa asociación Saúde Mental A Mariña reservando unha partida anual no seu orzamento para apoiar a esta entidade.

A rexedora, Dolores García Caramés, mantivo un encontro coa Directora Xeral Técnica da asociación Saúde Mental A Mariña, María José Nóvoa, e co seu presidente, Jorge Manchado, no que aproveitaron para asinar un convenio de colaboración que supón unha axuda nominativa de 20.000 euros co obxectivo de que poidan manter a calidade do servizo extraordinario que prestan desde a entidade tanto ás persoas usuarias como ás familias, destacando o gran labor que desenvolven, favorecendo a integración destas persoas con doenza mental na comunidade, a través dunha atención integral.

A alcaldesa destacou a relación periódica e fluída que existe entre a asociación e o concello, “sempre en permanente contacto para atender na medida das nosas posibilidades as súas necesidades e demandas porque a saúde mental é un tema que nos ten que ocupar e preocupar a todos”.

Apoiando a esta asociación –apuntou- non só estamos investindo nun recurso valioso, senón tamén enviando esa mensaxe clara de que a saúde mental, importa, e moito. Investir en saúde mental é investir no futuro da nosa comunidade.

A alcaldesa puxo de manifesto unha vez más o traballo da asociación, que desde as dúas unidades residenciais que ten en Cervo, proporciona un espazo seguro, e consigue crear sentido de comunidade envexable.

O seu labor axuda a fomentar a comprensión, e a derribar os muros de silencio que ás veces rodean estes temas.

Con esta axuda económica –engadiu- contribuímos a fortalecer as iniciativas que xa teñen en marcha, e a crear novas oportunidades para aquelas persoas que o precisan. Non só é un compromiso financeiro senón tamén unha mostra do apoio e recoñecemento á vital labor que realizan, dando pasos importantes cada día para derrubar os estigmas da saúde mental, sentenciou.