O exburelista Antoñito adiantou aos manchegos, que marcaron os tres tantos nos últimos seis minutos do choque disputado en Vista Alegre
Burela, 30 de novembro, 2024. O conxunto masculino do Pescados Rubén Burela sufriu este sábado a súa segunda derrota da tempada en Vista Alegre logo de caer ante un Quesos El Hidalgo Manzanares (0-3) que estivo moito máis acertado no treito final do partido, o que lle valeu para sumar o seu primeiro triunfo do curso a domicilio. Con este resultado, os mariñaos quedan agora seis puntos por baixo dos manchegos.
A primeira parte foi moi parella, entre dous equipos que saben defenderse moi ben e que non quixeron arriscar demasiado en ningún momento. A mellor ocasión chegou para os locais nun dobre penalti no minuto 18 que non aproveitou Juninho
Rikelme foi o primeiro en buscar o gol, cun balón no minuto 3 que se paseaba por diante da portería do Manzanares sen que ninguén lle tocase e posteriormente facíao cun disparo que despexaba Antonio Navarro. Non habería máis ocasións ata o ecuador do primeiro tempo, cando Javi Alonso remataba cun tiro cruzado unha acción persoal na que Kaluza metía o xusto as mans para evitar o gol visitante.
A partir de aquí gañaría o encontro a nivel de ocasións cun lanzamento de Malaguti desde fóra da área, que despexaba Antonio Navarro, e logo respondían os manchegos cun contragolpe que finalizaba moi alto Daniel. Segundos máis tarde era Isma o que o probaba tamén de lonxe coa esquerda e metía as xemas dos dedos o porteiro ciudadrealeño.
O cadro local cometía a súa quinta falta a 5 minutos e 40 segundos do descanso, mentres que os visitantes facíano cando restaban 180 segundos para o intervalo, pero só terían os mariñáns a opción de marcar desde os 10 metros. Gozaba dela Juninho tras unha falta sobre Malaguti, pero o envío do brasileiro era demasiado centrado e sacaba en dous tempos Antonio Navarro.
Antes do descanso repartíronse unha boa ocasión cada equipo. A primeira foi para os de casa despois dunha perda dos manchegos que terminaba Isma cun disparo durísimo ante o que realizaba un paradón Antonio Navarro. A segunda tivérona os forasteiros, nun tiro moi perigoso de Humberto que tocaba Kaluza e rozaba o pau esquerdo da meta laranxa.
O segundo tempo comezou cun paradón de Kaluza ante Daniel á saída dun córner. O brasileiro íase con calidade de Isma, pero o polaco resolvía con acerto o man a man. Respondía rápido o cadro local cunha boa triangulación que deixaba só a Pitero ante Antonio Navarro. O canteirán, demasiado escorado, remataba, pero tapaba ben o meta manchego. Pitero volvía ser protagonista na acción posterior de ataque dos visitantes, xa que rebañaba en última instancia un balón que se dispoñía a rematar a pracer a gol Humberto.
No minuto 24 Rikelme vía a súa segunda amarela e os locais quedaban en inferioridade. Defendéronse moi ben os discípulos de David Rial, que só concederon dúas ocasións neses dous minutos aos ciudadrealeños. En ambas aparecía un salvador Kaluza diante de Pedro e Humberto. Antes, os mariñáns tiveran mesmo unha oportunidade para adiantarse, pero o lanzamento de falta de Charly pegaba no corpo de Antonio Navarro.
A pesar de non aproveitar a superioridade, estiveron mellor os manchegos a partir dese momento, con moita máis presenza ante o marco contrario que os laranxas, aínda que Araya tamén dispuxo dunha boa ocasión diante do marco contrario nun disparo cruzado que tocou o xusto o cancerbeiro queixeiro. Xusto no ecuador do segundo período, Kaluza volvía facer enorme para deter un dous contra un dos visitantes que finalizaba Juan Emilio.
A lei do ex
Con 0-0 no electrónico e seis minutos por disputarse cumpriuse a lei do ex. Antoñito, que defendeu durante catro tempadas a elástica laranxa, aproveitaba un rexeite dun lanzamento de Daniel para adiantar ao seu equipo. Conseguía tocar o balón Kaluza, pero non coa suficiente forza para evitar o tanto.
Reaccionou o cadro local con dúas poutadas de Malaguti, o home máis entoado este sábado nos mariñáns. No primeiro pedía o benaventano penalti por derruba dun xogador manchego e no segundo conseguía superar a Antonio Navarro, pero o seu disparo, xa un tanto forzado, pegaba na base do pau.
Non chegou o empate e na seguinte acción poñían o 0-2 os visitantes. Araya derrubaba na área a Juan Emilio e Daniel non desaproveitaba un penalti no que Kaluza volvía estar a piques de deter o disparo. Tocou o balón o polaco, pero non o suficiente. Con Isma xogando de porteiro-xogador, Zequi redondeaba a conta manchega cun tanto desde a súa propia área aproveitando que a meta local estaba desguarnecida.
Ficha Técnica Pescados Rubén Burela FS 0-3 Quesos El Hidalgo Manzanares
Pescados Rubén Burela FS (0): Kaluza; Isma, Alberto, Rikelme, Malaguti -quinteto inicial-, Araya, Juninho, Charly, Pitero, Meira e Quelle.
Quesos El Hidalgo Manzanares (3): Antonio Navarro; Javi Alonso, Pedro, Antoñito, Daniel -quinteto inicial-, Juan Emilio, Humberto, Zequi e Pedro Herreros.
Goles: 0-1, min. 34: Antoñito. 0-2, min. 36: Daniel, de penalti. 0-3, min. 37: Zequi.
Árbitros: González Moreta e Sánchez Chamorro (Colexio Madrileño). Expulsaron ao local Rikelme no minuto 24 por dobre tarxeta amarela. Tamén amoestaron polos burelistas a Malaguti, Araya e Isma, así como ao seu técnico, David Rial. Mentres, viron a amarela os visitantes Pedro Herreros, Daniel e Javi Alonso, ao igual que o seu adestrador, Juanlu Alonso.
Incidencias: Encontro da novena xornada da Primeira División masculina disputado no pavillón de Vista Alegre diante duns 900 espectadores.
A actividade puxo o broche final ao Programa Integral de Envellecemento Activo Municipal cunha charla sobre a xestión emocional das enfermidades neurodexenerativas, impartida pola psicóloga Carmen Breijo, da Fundación Degén, quen ofreceu un espazo de reflexión, aprendizaxe e orientación. A sesión contou tamén coa presenza do concelleiro Alfredo Fernández, que destacou a importancia de crear espazos de participación, coidado e benestar para as persoas maiores. O Concello agradeceu a colaboración da Asociación de Xubilados Terramar e da Fundación Degén, así como a participación de todas as persoas asistentes.
No acto acompañará ao autor o filólogo e escritor Ramón Reimunde.
O cambio resulta necesario porque a instalación das atraccións impide o paso dos camións de recollida por estes puntos. O contedor situado na Travesía Granxas trasladarase á avenida de Vilalba, mentres que o instalado na rúa Antonio Roca pasará á rúa Suasbarras. Ademais, o Concello reforzará a dotación de contedores no Campo da Festa e no Campo da Pascua, onde se colocarán máis unidades para atender o incremento de residuos previsto durante a celebración. Desde o Concello agradécese a comprensión á veciñanza polos cambios realizados e lémbrase a importancia de depositar os residuos nos contedores situados nas novas localizacións, co fin de facilitar o correcto funcionamento do servizo de recollida.
O alumnado de 2º curso das familias profesionais de Instalacións e Mantemento, Imaxe Persoal e Administración e Xestión remataron o curso e a súa formación en centros de traballo co que xa conseguiron a súa titulación como técnicos de grao medio ou grao superior para incorporarse ao mercado laboral. Desde o IES Perdouro, destácase o alto grao de empregabilidade destas ensinanzas e a importancia que para o ámbito laboral ten a incorporación destes profesionais, ao mesmo que lles trasladamos os parabéns pola súa recente titulación.
O festival terá lugar os próximos 1, 2, 3 e 4 de xullo na parroquia de Celeiro do concello costeiro, que volverá acoller este popular evento cultural centrado na música punk, metal e hardcore.
Destacou o labor da asociación xuvenil A Rumboia, que en poucas edicións converteu o evento nun referente cultural da Terra Chá e nun motor para o turismo e a economía local. O cartel inclúe Caamaño & Ameixeiras, Ulex, La Txama, Boyanka Kostova, Bea Fernandes e Lucasiito B2B Somiiux. Haberá tamén actividades para todas as idades —xogos, obradoiros, contacontos e artesanía— no campo da feira de Gontán, con entrada gratuíta.
