O Concello de Cervo segue a colaborar coas persoas apicultoras para tentar paliar os efectos da velutina, que atenta contra a nosa biodiversidade

Fíxose unha nova entrega de produto atraente de balde, co fin de atacar ás raíñas na primavera

Cervo, 6 de marzo, 2023. A edil de Medio Ambiente e o concelleiro de Zona Rural, Mali Méndez e Adrián Arias, respectivamente, mantiveron un novo encontro coas persoas apicultoras do municipio a fin de abordar a incidencia da avespa velutina na actualidade e analizar a situación actual da praga.

Tal e como apuntaron, o obxectivo deste novo encontro “é seguir estando, tal como vimos facendo dende que temos constancia da presenza desta especie invasora no noso Concello, ao carón dos nosos apicultores, e tentar protexer, na medida das nosas posibilidades, o seu traballo e o das súas abellas; coa campaña de entrega de atraentes de balde, que comezamos no 2017, e que, tal e como nos trasladaron, tivo a súa eficacia como ferramenta para capturar as raíñas”.

De feito, nesta reunión, logo de poñer en común a evolución das colmeas procedeuse a entregar novo produto atraínte de balde, co fin de atacar ás raíñas nesta primavera, que é o momento crucial para facelo, para tentar así frear a expansión da velutina e a formación de niños de cara aos vindeiros meses”.

A súa eficacia –explicaron- depende de que todos o utilicemos de xeito responsable “ao entregar este produto tamén estamos compartindo unha mensaxe de compromiso e responsabilidade porque todos temos un papel importante que desempeñar nesta loita, xa sexa colocando trampas, informando sobre a presenza de niños ou simplemente difundindo información sobre esta especie invasora que ataca a nosa biodiversidade”.