Un salto ao 1900: Mondoñedo revive a Belle Époque nunha experiencia única

Mondoñedo, 1 de xullo, 2026. O vindeiro sábado 18 de xullo a partir das 18.00 horas, Mondoñedo ofrecerá unha oportunidade única para viaxar no tempo coa celebración de “Mondoñedo no tempo”, unha experiencia gratuíta de recreación histórica que trasladará aos participantes á vida cotiá da cidade a comezos do século XX.

A actividade partirá da Praza da Catedral, onde dará comezo un paseo guiado por diversos puntos de interese histórico da cidade que culminará no Barrio dos Muíños. Unha vez alí, poderase gozar tamén dunha visita guiada ao Pazo de San Isidro, coñecendo a súa historia e o seu valor patrimonial e inmortalizando o momento en varias estancias do histórico lugar.

Inscrición previa

“Mondoñedo no tempo” propón unha inmersión no ano 1900 Belle Époque, recreando o ambiente, os costumes e a forma de vida da época. É imprescindible realizar inscrición previa na Oficina Municipal de Turismo de Mondoñedo, xa sexa de forma presencial, chamando ao 982 50 71 71 ou enviado un correo a turismo@concellomondonedo.es. No momento da inscrición facilitaráselles aos participantes unha guía de vestiario, de obrigado cumprimento para poder formar parte da recreación. Gustaríanos destacar que, aparte destas indicacións, a moda indiana tan característica da nosa comarca forma parte tamén desta época e sería válida para participar.