O BNG destaca en Lourenzá o papel estratéxico da faba e do medio rural para a soberanía alimentaria

Lourenzá, 3 de outubro, 2026. Na mañá de hoxe, unha representación do BNG —formada polo parlamentario mariñao Daniel Castro, o responsable comarcal Antonio Veiga, o deputado de Medio Rural da Vicepresidencia da Deputación de Lugo Daniel García, a vicerresponsable comarcal Iria Cotelo e representantes do BNG en Lourenzá coa concelleira Belén Fanego á fronte— participou na XXXIV Festa da Faba. Durante a xornada mantiveron conversas con produtores e produtoras, así como cos responsables da IXP Faba de Lourenzá e da cooperativa Terras da Mariña, co obxectivo de coñecer de primeira man a situación do sector nun ano especialmente complexo.

Garantía de desenvolvemento sostible

Desde o BNG salientan o traballo desenvolvido polo sector da faba en Lourenzá e na comarca, e subliñan que as políticas para o medio rural deben ser estratéxicas. Segundo explicou Daniel Castro, estas políticas “son pezas fundamentais para manter a produción de alimentos, asegurar o maior grao posible de soberanía alimentaria e avanzar na garantía dunha alimentación saudable para a sociedade. Ao mesmo tempo, forman parte dun proxecto de ordenación do territorio necesario para o conxunto do país”.

Castro destacou tamén que o esforzo dos produtores e produtoras, da cooperativa e da IXP ao longo dos últimos anos deu resultados en múltiples ámbitos, entre eles o cumprimento de obxectivos de desenvolvemento sostible e a creación de emprego.

A importancia da soberanía alimentaria

O parlamentario mariñao puxo en valor o papel da faba para Lourenzá, resaltando “o valor colectivo da produción no val, que crea un sentimento de pertenza arredor desta xoia da terra. É un produto de temporada, pero que se pode consumir todo o ano. É fundamental o labor que realizan tanto os produtores e produtoras como a IXP Faba de Lourenzá para achegar á poboación a importancia da soberanía alimentaria e do consumo responsable”.

Produtos frescos e mercados de proximidade

Pola súa banda, o deputado de Medio Rural da Deputación de Lugo, Daniel García, lembrou o traballo que se está a desenvolver desde esta área para impulsar, a nivel municipal, a creación, consolidación e recuperación de mercados de proximidade. Estes espazos, explicou, son unha ferramenta estratéxica para achegar á cidadanía produtos frescos e transformados procedentes do sector agrogandeiro da comarca.

Niveis de renda dignos para o sector agrario

O BNG defende que, no marco do Plan Estratéxico da PAC 2021-2027, é necesario garantir niveis de renda dignos para a produción agraria, estabilizar os mercados e equilibrar as relacións entre os distintos axentes da cadea agroalimentaria. Tamén consideran fundamental reducir os desequilibrios existentes na agricultura comunitaria, permitindo que áreas periféricas como Galiza poidan desenvolver plenamente a súa capacidade produtiva.

Finalmente, os nacionalistas insistiron en que no centro das políticas agrarias deben estar as persoas que viven no medio rural, especialmente aquelas que traballan no sector agrario, para que poidan acceder a rendas dignas, recoñecemento social e servizos que lles permitan desenvolver o seu proxecto de vida.