CCOO denuncia que o Sergas bate récords históricos de listaxes de agarda mentres a Xunta inxecta 26 millóns de euros en controlar as baixas médicas

A campaña contra o absentismo e o plan acordado pola Xunta, os empresarios e a UGT non son a resposta a un problema que non crearon as persoas traballadoras: o colapso asistencial

Santiago de Compostela, 3 de outubro de 2026. A Consellería de Sanidade acaba de publicar as listaxes de espera do Sergas e os números falan por si mesmos: 55 348 persoas agardan por intervención cirúrxica (91 días de media), 137 600 por probas diagnósticas —as endoscopias, 156 días— e 230 614 por consulta externa (69,8 días). En catro anos, hai máis de 32 000 pacientes novos agardando por ver un especialista. Son datos demoledores que supoñen a proba definitiva de que a política sanitaria da Xunta fracasou.

Precisamente agora, co Sergas no seu peor momento histórico, a Xunta impulsa a campaña contra o ‘absentismo’ e o denominado «Plan do control ao coidado», destinando 26 dos seus 45 millóns de euros (58 %) a controlar e acurtar as baixas médicas. CCOO pregúntase como pode falar ese documento de «recuperación funcional» cando unha persoa con síntomas agarda cinco meses por unha endoscopia? Se as baixas se acurtan, non é porque haxa curación: é porque hai presión administrativa, propostas de alta das mutuas, medo ao despedimento e estigmatización pública de quen enferma.

O 66 % das baixas duran menos de 15 días e a duración media da IT non varía desde 2007. Non existe «abuso xeneralizado», como admite o propio informe. O plan constrúe un inimigo ficticio —o traballador enfermo— para desviar o debate do verdadeiro problema: a desatención. Máis control sobre a persoa traballadora e sobre as e os profesionais da sanidade pública; ningunha esixencia ás empresas —nin prevención, nin salarios, nin o cobro do case 40 % das horas extraordinarias sen pagar en Galicia—; e infrafinanciemento do sistema sanitario.

CCOO lamenta que o PP, a CEG e a UGT de Galicia asinaran un plan que penaliza a quen exerce o seu dereito constitucional á saúde, fixando como éxito a velocidade de resposta ás propostas de alta das mutuas e creando «dispositivos fronte a abusos» que non existen.

O sindicato entende que cos datos do Sergas enriba da mesa, e outros factores achegados por CCOO, é o momento de retirar o plan e abordar medidas reais para protexer a saúde das persoas traballadoras como punto fundamental para asegurar o benestar e a produtividade laboral.

CCOO esixe un plan de choque real contra as listas de agarda, con persoal e medios verificables; a retirada dos indicadores de presión sobre o persoal facultativo; e protección fronte ao despedimento por baixas. Quen enferma non é un sospeitoso, é un titular de dereitos. E a solución non é menos baixas, é máis sanidade pública.