ADEGA pide apoio para os medios de comunicación en galego

Nota de prensa:
NON AO PECHE DOS MEDIOS DE COMUNICACIÓN EN GALEGO

Compostela, a 28 de xuño de 2011.- Ante o triste anuncio de que hoxe publica o seu último número o diario galego Galicia Hoxe, ADEGA quere amosar a súa indignación pola desaparición progresiva que están a sufrir no país os medios de comunicación escritos e dixitais que se expresan na nosa lingua. Primeiro foi o peche de Vieiros, A Peneira, GZNación e a edición impresa de A Nosa Terra, e agora o de Galicia Hoxe. ADEGA considera que esta sucesiva eliminación de medios en galego non responde tan só a unha cuestión de inviabilidade económica, senón, e sobre todo, á discriminación e ao recorte de axudas que estes están a padecer por parte das Administracións públicas, nomeadamente da Xunta, fronte a outros soportes escritos en lingua española.

Desde ADEGA queremos expresar a nosa máis fonda tristeza pola desaparición deste xornal que, a pesares de non ser dos soportes que contaban con máis recursos en Galiza, sempre foi receptivo e respondeu moi positivamente ás nosas convocatorias e notas de prensa e á información ambientalista en xeral. Queremos solidarizarnos cos xornalistas que quedan sen emprego e, especialmente, agradecer e recoñecer a profesionalidade de traballadoras de Galicia Hoxe que sempre estiveron comprometidas coa defensa da información ambiental e con darlle voz ao ecoloxismo, ao sector asociativo ou a plataformas de afectados polos impactos exercidos sobre o territorio galego.

O ecoloxismo galego e a defensa do medio natural precisan de profesionais do xornalismo e de medios de comunicación coma estes que, ademais de defender a lingua do país, atenden a cuestións de especial relevancia social e ambiental omitidas por outros medios máis pendentes de contentar ao goberno ou aos intereses do capital. Alén diso, criticamos que a Xunta estea a destinar a meirande parte dos fondos públicos para o fomento do galego en medios que, a pesar de ser producidos en Galiza, minimizan, omiten ou desvirtúan toda información que teña que ver coa defensa da nosa lingua e tamén do noso medio natural, como é o caso, por exemplo, de La Voz de Galicia. Namentres, déixase esmorecer o único xornal impreso e diario que ficaba no país publicado integramente en galego.

A situación pola que están a pasar os medios de comunicación en galego é nefasta e non se pode seguir tolerando, nin polas administracións públicas, nin pola sociedade galega en xeral. Por iso demandamos da Xunta que cumpra dunha vez por todas coas súas responsabilidades no terreo da política de normalización lingüística, que non discrimine e non recorte as axudas para os medios escritos en galego e que favoreza e facilite, como así está obrigada, o acceso á información en galego nos medios de difusión xeral (ademais dos medios públicos), e sobre todo daqueles que comunican integramente na nosa lingua e atenden a cuestións de interese público, xeral e social como é o ecoloxismo. Ao mesmo tempo, pedimos ao conxunto da sociedade galega que demande unha maior presenza do idioma galego nos soportes de comunicación mediática xeral.