A Deputación insta ao Sergas a manter o servizo de 24 horas da ambulancia asistencial de Foz

Nota de prensa

A DEPUTACIÓN INSTA AO SERGAS A MANTER O SERVIZO DE 24 HORAS DA AMBULANCIA ASISTENCIAL DE FOZ

Antonio Veiga informou de que a Xunta de Goberno da Deputación acordou dirixirse á Xunta de Galiza para que a ambulancia asistencial con base en Foz continúe co seu funcionamento as 24 horas

Veiga tamén anunciou que en outubro a través do programa “Todos a Xogar” poranse monitores a disposición dos centros escolares e ANPAS para levar a cabo actividades extraescolares

Lugo, 9 de setembro 2011. O nacionalista Antonio Veiga, vicepresidente da Deputación de Lugo, na rolda de prensa posterior á Xunta de Goberno da Deputación, deu conta dun acordo que adoptou a Xunta de Goberno da Deputación no cal “expresamos o rexeitamento da Corporación Provincial á supresión da ambulancia asistencial que, con sede en Foz, atendía a este Concello xunto aos de Ferreira do Valadouro e Barreiros”. Segundo explicou Veiga, “a posición que vimos de adoptar hoxe, coherente coas xa adoptadas polas corporacións municipais de Foz e Ferreira, á marxe de significar a perda de emprego, non ofrece garantías asistenciais e non implica un aforro significativo porque debemos ter en conta que o seu servizo non se limitaba aos concellos referidos, senón que operaba noutros concellos da Mariña, ademais de ser utilizada para traslados intra hospitalarios, situándose no mes de xullo en 62 as incidencias ás que tivo facer fronte só en horario nocturno”.

Para Antonio Veiga non hai, polo tanto, “razóns que xustifiquen esta decisión se non partimos do obxectivo non explicitado, pero si verificado na práctica, do Partido Popular de pasarlle rebarbadora ao sistema sanitario público en Galiza e, de xeito moi particular, en Lugo”. Veiga afirmou que “o caso que hoxe denunciamos aquí non é algo illado, senón que debemos vincular con esta ofensiva do PP que pretende converter a nosa saúde nun negocio e que vai ter o seu correlato na supresión da Area Sanitaria da Mariña e de Monforte”. Por todo isto, Veiga afirmou que “a reivindicación do acordo tomado en Xunta de Goberno é claro, e consiste en solicitar do SERGAS que manteña o servizo as 24 horas da ambulancia asistencial que dá cobertura preferente aso concellos de Foz, O Valadouro e Barreiros”.

Por outra banda, Antonio Veiga anunciou que “desde a Área de Deporte da Deputación, no marco do programa “Todos a xogar” que desenvolvemos xunto á Fundación Balogal, e que vai arrancar o 1 de outubro, imos ofertar unha opción específica dirixida aos centros de primaria e que consistirá en poñer á súa disposición monitores deportivos para desenvolver actividades extraescolares nos centros”. “A decisión que vimos de tomar en relación con ofertar esta actividade en primaria,-engadiu Veiga- vai máis alá da importancia da práctica deportiva como elemento de socialización dos nenos e das nenas, posto que pretende garantir na escola pública unha oferta complementaria, a fin de que non se xere un agravio comparativo con outros centros que si que contan co favor da administración”. Antonio Veiga sinalou que “a estas horas estanse mobilizando miles de profesores na capital de Galiza polos recortes que a Xunta está a acometer no ensino, uns recortes que van significar a destrución de preto de 1000 empregos, arredor de 200 en Lugo, e que vai provocar un grave deterioro na calidade educativa dos nosos centros de ensino”.

Antonio Veiga incidiu nesta cuestión e lembrou que “este curso escolar terá menos profesorado, as aulas estarán máis masificadas, agruparase alumnado de niveis e/ou ciclos e idades diferentes nunha mesma aula, as necesidades educativas especiais non se atenderán adecuadamente e a orientación escolar será deficiente; Suprimiranse os desdobres, restrinxirase a atención á diversidade e os agrupamentos flexíbeis, suprimiranse os reforzos e apoios educativos, a atención personalizada farase imposíbel e numeroso profesorado terá que impartir materias das que non é especialista”.

Por todo isto “o programa “Todos a Xogar”, con esta opción á que estou a referirme –engadiu Antonio Veiga, vén cubrir unha demanda que tería que cubrir a Xunta de Galiza, unha Xunta de Galiza que non entende o ensino como un factor de igualdade, e nesa perspectiva é a Área de Deportes da Deputación quen lle lava a cara aos que entenden o ensino como un negocio pero sobre todo que cubre as demandas de formación que non atende o Goberno Galego. Unha e outra decisión, isto é os recortes en sanidade e educación por parte da Xunta de Galiza e as actividade extraescolares que vai desenvolver a través do programa “Todos a Xogar” esta area nos centros de primaria, son ven exemplificadoras do que facemos e defendemos uns e outros. Primeiramente porque deixa claro que o Goberno Galego pasou por converterse nun problema para os a sociedade galega, fronte a outro goberno o da Deputación que pon solucións riba da mesa, mesmo excedéndose no seu ámbito competencial. E en segundo lugar porque evidencia as prioridades na acción de goberno duns e doutros, fronte aqueles que apostamos polas persoas e pola súa calidade de vida, están os outros, que utilizan a escusa da austeridade para empeorar as condicións de vida da xente, e sobre todo do rural”.

Noutro punto da orde do día, Antonio Veiga informou da aprobación dun convenio co Círculo das Artes de Lugo por importe de 75.000 euros coa finalidade de levar a cabo melloras nesta infraestrutura, sobre todo de cara á súa accesibilidade para persoas con mobilidade reducida, tendo en conta o grande número de actividades culturais que se desenvolven neste edificio e a cantidade de lucenses que asisten.