Máis de 200 profesionais participarán en Burela nunhas xornadas formativas do sistema de protección a infancia

MÁIS DE 200 PROFESIONAIS DO SECTOR DARANSE CITA EN BURELA OS DÍAS 8 E 9 DE XUÑO

BURELA ACOLLE EN XUÑO UNHAS XORNADAS FORMATIVAS PARA PROFESIONAIS DO SISTEMA DE PROTECCIÓN Á INFANCIA

A Asociación Galega de Centros de Menores organiza o curso sobre “O traballo coa Familia nos centros de protección á infancia”, que se celebra na Casa de Cultura de Burela os próximos 8 e 9 de xuño.

A localidade de Burela acolle os días 8 e 9 de xuño o curso “O Traballo coa Familia nos Centros de Protección á Infancia”, que organiza AGACEME (Asociación Galega de Centros de Menores) en colaboración coa Universidade da Coruña e as Fillas do Divino Celo – Rogacionistas de Burela.

A Conselleira de Traballo e Benestar da Xunta de Galicia, Beatriz Mato, inaugurará as xornadas o venres 8 de xuño ás 4 da tarde. Ao longo das dúas xornadas, o curso contará tamén coa participación de numerosos técnicos e profesionais de Galicia, Asturias, Castela e León, Cataluña e Portugal.

O curso presenta un completo programa de ponencias, mesas redondas e talleres prácticos, impartidos por profesionais do acollemento residencial, a protección á infancia, a intervención social, o labor psico-educativa e terapéutica ou as técnicas de comunicación aplicadas aos servizos sociais.

O venres 8 de xuño durante a cea oficial do curso celebrarase o acto de entrega da Certificación ISO 9001:2008 por parte da empresa Bureau Veritas a algúns dos principais centros de protección á infancia de Galicia, cuxos representantes tamén estarán presentes nestas xornadas.

Asimesmo neste acto estarán presentes a Delegada Territorial da Xunta de Galicia en Lugo, Raquel Arias; as Secretarias Xerais de Política Social e de Igualdade da Xunta de Galicia, Coro Piñeiro Vázquez e Susana López Abella, respectivamente; e o Alcalde do Concello de Burela, José González Barcia.

Na páxina web www.agaceme.com ofrécese información máis detallada sobre o evento. O prazo de inscrición finaliza o próximo luns 28 de maio, se ben a organización amósase moi satisfeita coa participación, pois estima que asistirán máis de 200 profesionais do sector, chegados de distintas entidades de Galicia e do resto de España.