O CONCELLO DESIGNARÁ FILLOS ADOPTIVOS DE RIBADEO A JOHN RUTHERFORD E JOSÉ CALAVERA, E FILLO PREDILECTO A VÍCTOR MORO, SEGUNDO ANUNCIABA ESTE MEDIODÍA O ALCALDE. TAMÉN HABERÁ UN ACTO DE RECOÑECEMENTO PÚBLICO PARA OS CONCELLEIROS QUE FORMARON PARTE DAS DISTINTAS CORPORACIÓNS RIBADENSES.
Ribadeo, 6 de xullo de 2012. No vindeiro pleno do Concello aprobaráse a designación de fillos adoptivos de Ribadeo para John Rutherford e José Calavera, e de fillo predilecto para Víctor Moro, segundo daba a coñecer este mediodía o alcalde, Fernando Suárez. Nesa sesión tamén se lles dará nome a 21 rúas, prazas e espazos públicos da vila.
O rexedor dixo que “aproveitando unha serie de problemáticas que desde hai tempo o servizo de Correos nos indica coa confusión de moitas rúas, espazos públicos que ás veces non teñen denominacións concretas ou claras e ao mesmo tempo como temos a necesidade de recoñecer a vida, a obra, a labor de determinados persoeiros estivemos traballando entre todos os grupos e debo destacar a unanimidade e o esforzo que fixemos todos para chegar a este acordo. Todos os grupos da Corporación fomos poñendo propostas enriba da mesa e lóxicamente nin a nós como goberno nos gustaban algunhas dos grupos da oposición nin viceversa, pero todo soubemos ser xenerosos e Ribadeo merece que cheguemos a acordos nestas cuestións como noutras moitas”.
Suárez Barcia sinalou que “decidimos nomear 21 rúas, espazos e prazas públicas, facer un recoñecemento a persoeiros vinculados con Ribadeo e acordamos facer máis adiante un acto de recoñecemento público ás persoas vivas ou non que formaron parte das Corporacións democráticas de Ribadeo desde as primeiras eleccións democráticas, é dicir desde ano 1979”.
O alcalde de Ribadeo explicou que “no caso das rúas hai 21 viais e espazos públicos que recibirán novas nominacións, respondendo nalgúns casos a topónimos históricos ou tradicionais de Ribadeo. Hai unha rúa que leva o nome do primeiro alcalde democrático que tivo Ribadeo no período democrático da segunda república española; dámoslle nomes de destacados persoeiros cinvulados ao arte como Benito Prieto Cousent ou coma os irmáns Suárez Couto. Noutros casos fixémonos eco de acordos do mandato anterior da Corporación anterior como denominar a praza 8 de marzo ou a rúa Meniñas da Saudade. Damos noutros casos nomes de persoas, pero que respostan a unha cuestión simbólica e sentida coma unha rúa que lle queremos dar a José Couso, que representa o dereito á información nos conflictos bélicos e a sin razón das guerras, e que foi unha víctima colateral dun conflicto imperialista coma o que levou á guerra no Irak por parte dos Estados Unidos”. E engadiu “ao mesmo tempo queremos recoñecer unha vía coma avenida da ría de Ribadeo e o labor de estadistas vinculados a esta vila do século XIX ou principios do XX, que coas súas cualidades humanistas tamén puxeron o nome de Ribadeo polo mundo adiante”.
Sobre os recoñecementos de persoeiros “acordamos entre todos designar dous fillos adoptivos, John Rutherford e José Calavera, e designar como fillo predilecto a Víctor Moro. Empezando por éste último, Víctor Moro é un activo defensor da legalidade e do recoñecemento do topónimo histórico, legal e vixente de ría de Ribadeo. John Rutherford é galeguista, galicianista e hispanista, que aínda non nacendo no noso concello é un incasable defensor da nosa lingua e da nosa cultura galega e un exemplo para todos nós. E José Calavera é un extraordinario profesional e tivo un traballo abnegado, esforzado e altruista para a conservación da Torre dos Moreno e froito do seu traballo hoxe estamos empezamos a ver os primeiros resultados”.
Suárez Barcia reiterou que “queremos facer un acto de recoñecemento público ás persoas, vivas en moitos casos e lamentablemente mortas noutros, pero que formaron parte das diferentes Corporacións democráticas de Ribadeo en diferentes grupos políticos, pero co convencimento desde diferentes ópticas e visións que tentaron facer o mellor para Ribadeo”.
—————————-
NOMES PROPOSTOS PARA AS RÚAS E ESPAZOS PÚBLICOS
1. Vía Transversal, da rotonda do Xardín ao camiño dos Galos. Avda. de Rafael Fernández Cardoso
Foi o Alcalde que tivo Ribadeo na II República. Tivo que exiliarse.
2. Vía Transversal, desde estrada da Deputación na Lodeira ao Camiño Real da Lodeira. Avda. de Claudio Pérez Prieto.
Boticario. De fondo espírito altruísta. Foi secretario do Partido Galeguista de Ribadeo. Foi tamén Presidente do Coro Cantigas da Mariña.
3. Vía Traseira Colexio Sagrado Corazón. Rúa de Sor Pilar de León
4. Camiño Os Garitos, Traseira do Restaurante Casa Pepe. Rúa dos Garitos
5. Praza interior edificio da Rúa Buenos Aires-Rúa Dionisio Gamallo. Praza da Música.
Nome popular dese espazo desde hai uns anos.
6. Praza Detrás do Cine Teatro . Praza 8 de marzo.
Data que exalta o Día Mundial das Mulleres e que xa tiña un acordo dunha comisión institucional do mandato anterior.
7. Estrada Xeral Vilar, desde Rotonda do Voar á Rotonda de Dompiñor. Avda. da Ría de Ribadeo
8. Rúa do Cuartel da Garda Civil. Rúa José Couso.
Representa o dereito á información nos conflitos bélicos e a sen razón das guerras. É tamén unha vítima colateral dun conflito imperialista.
9. Antiga estrada acceso a Ribadeo nos Garitos. Rúa Segundo Moreno Barcia.
Redactor do primeiro proxecto dunha Constitución de corte federal. É autor do Proxecto de Constitución para o estado galaico (1887). Avogado, deputado polo distrito de Ribadeo. Incorporouse a Solidaridad Gallega e á Institución Libre de Enseñanza. Referente do librepensamento e anticlericalista.
10. Camiño Escaleira. Rúa de Juan Suárez Casas.
Alcalde de Ribadeo e científico a finais do XIX. Primeiro introdutor de maquinaria agrícola. Primeiro promotor liña de automóbiles en Ribadeo.
11. Travesía Rúa Nova. Rúa do Pipelo.
Microtopónimo do regato que levaba ese nome e que viña desde Ove até o casco vello, pasando polo lavadoiro dos Fornos.
12. Travesía do Cuartel Vello, entre Av. Calvo Sotelo e Rúa San Miguel. Rúa Juan Suárez Acevedo.
Profesor, intelectual humanista.
13. Estrada da Deputación na Lodeira des Av. Rosalía até a Autovía . Rúa da Lodeira.
Preténdese manter o topónimo dese entorno dándolle o nome á rúa principal que vai até o barrio do mesmo nome.
14. Travesía Vilaselán a Terragrande. Rúa Meniñas da Saudade.
Grupo de gaiteiras e de folclore galego do Ribadeo dos anos 60. Son a primeira banda de gaitas formada exclusivamente por mulleres de Galiza e do Estado.
15. Rúa posterior á Av. Rosalía de Castro, aínda sen entregar ao Concello. Rúa Irmáns Suárez Couto. Amando foi pintor de relevo e Enrique impulsou decididamente a Escola Pedro Murias. Tamén Carlos..
16. Camiño da Lodeira. Rúa da Illa Pancha
17. Camiño dos Galos, da E.O.I. á Autovía. Rúa Manuela Barreiro Pico.Primeira farmacéutica de Ribadeo
18. Travesía dos Galos, Traseira da actual Vía Transversal . Rúa Benito Prieto Cousent.
Pintor de relevo. Profesor universitario. Galeguista. Director da revista A Fouce.
19. Camiño sen saída nos Galos. Rúa Justo Pico de Coaña. Pedagogo
20. Camiño dos Galos, desde o remate de Carlos III á Rotonda da Autovía en Vilaselán. Rúa dos Galos
21. Camiño das Barreiras, desde a Av. Calvo Sotelo á Estrada ao Cargadoiro. Rúa Antonio Rodríguez Darriba. Médico
Baixo o título “A guerra en Oriente Medio. Do xenocidio en Palestina á agresión a Irán”, o analista internacional Duarte Correa ofrecerá unha intervención centrada na evolución do conflito, o impacto humanitario e as implicacións xeopolíticas da escalada bélica na rexión.
A proba, organizada polo CP Altrúan, reunirá 137palistas dos seis clubs lucenses de augas tranquilas que participan na competición: o propio Altruán, o CD San Ciprián, o Club Kayak Foz, o CP Viveiro Urban Hotel, o Cidade de Lugo e o Club Fluvial de Lugo. O deputado de Mocidade Daniel García achegouse esta tarde a Ribadeo para presentar a proba, que comezará ás 15.30 coa saída dos prebenxamíns e benxamíns. A continuación e de forma escalonada, desenvolveranse as probas das categorías infantil, alevín e cadete e xuvenil.
A partir das 19:45 horas abrirán a xornada o Cuarteto Illa Pancha e Tradigalu, mentres que desde as 20:00 horas se poderán degustar hamburguesas á parrilla, bocadillos de panceta e chourizos asados. Xa pola noite, ás 21:30, tomarán o relevo Mi Rollo es el Rock, antes da tradicional fogueira de San Xoán, prevista para as 00:00 horas. A celebración, organizada por A Rebolaxe coa colaboración do Concello de Cervo e a Deputación de Lugo, inclúe tamén o sorteo dunha paleta de cocho e contará con aparcamento habilitado no Estanco da Praia do Torno.
A Garda Civil de Burela tomou declaración este 10 de xuño a unha representante do departamento en liña de Porcelana de Sargadelos, que denunciou unha estafa na que se emprega a imaxe da empresa para enganar clientes. Segundo explicou, desde finais de abril están a aparecer páxinas web falsas con descontos do 80% e perfís fraudulentos en redes sociais como Instagram, TikTok e Facebook, a través dos que varios usuarios xa foron estafados. A compañía presentou denuncias contra distintos dominios e contas, das que só unha continúa activa, e achegou tamén os rexistros da marca e as comunicacións realizadas ante Meta. A denuncia foi formalizada no cuartel da Garda Civil de Burela, onde quedou incorporada ás dilixencias abertas polo corpo.
O deputado galego Francisco Millán Mon explicoulles o día a día da súa actividade nesta cámara e a importancia da Unión Europea para Galicia e viceversa. Desde a dirección do centro agradecen “a súa exposición e o trato dispensado ao alumnado e profesorado desprazado a Bruxelas”. Neste 2026 cúmprense 40 anos da adhesión de España á Comunidade Económica Europea, así se denominaba naquel momento. O IES de Ribadeo é Escola Mentora do Programa Escolas Embaixadoras do Parlamento Europeo.
Foi unha xornada máxica na que a música e a convivencia se deron a man nunha contorna única. Os instrumentos de corda encheron de melodías os xardíns do centro, creando unha atmosfera especial que emocionou ao público asistente e puxo en valor o talento e a ilusión da mocidade. A alcaldesa de Cervo, Dolores García Caramés, non quixo perderse esta cita tan especial e desfrutou da tarde xunto ás persoas usuarias, e o persoal do centro. Durante o encontro, agradeceu o convite e felicitou á organización por promover actividades que fomentan a cultura, a inclusión e os espazos de encontro entre a veciñanza.
A mostra, aberta na sala de exposicións do Auditorio Municipal de luns a venres entre as 18:00 e as 22:00 horas, reúne preto de 30 obras de artistas emerxentes e consolidados, ofrecendo diversas miradas sobre a paisaxe, a identidade, a memoria e a realidade contemporánea. A alcaldesa, Marta Rouco, destacou o valor de que Vilalba forme parte desta programación compartida e o impacto positivo que supón para a actividade cultural local.
