O BNG concentra en Burela un cento de persoas en defensa do ferrocarril da Costa

Máis dun cento de persoas concéntranse en Burela en defensa do ferrocarril un día antes de que a compañía tome a decisión definitiva sobre as súas liñas mariñáns.

Parga acusa ao PP de prender acabar coa Mariña e chama a rebelión dos mariñaos contra os designios da dereita.

O BNG chama as forzas sociais e políticas a dar á batalla até as últimas consecuencias para salvar o tren da costa.

A Mariña, 4 de Agosto de 2012. Un cento de persoas entre militantes e veciños acudiron hoxe ás 11:30 da mañá a concentración convocada na estación de tren de Burela para demandar precisamente un día antes da xunta que a dirección de FEVE ten en Ferrol que a mesma garanta a continuidade das liñas de ferrocarril existentes na Mariña desde a consideración do seu papel central para a vertebración territorial da Comarca e poñendo en valor as súas potencialidades tanto para a mobilidade de persoas como para o transporte de mercadorías. .

Antonio Veiga, responsábel Comarcal do BNG, indicou que “estamos dun tren que chegou tarde e porén queren que sexamos os primeiros e que nos quedemos sen o mesmo . É máis non é casual que a empresa pública FEVE teña previsto reducir a partir do mes de Outubro curiosamente as dúas liñas con máis usuarios, isto é a que sae de Ferrol ás 8,10 e chega a Oviedo ás 14:30 e a que sae de Oviedo ás 7,45 e chega a Ferrol ás 14:10, o que significa no primeiro caso que non funcione ningún traxecto entre Viveiro e Ribadeo até as 12,19 e no segundo a ausencia de liñas desde 6,50 até as 14,45. Outro tanto acontece coa proposta prevista para os meses de Xuño a Setembro onde se propón suprimir a liña que sae de Ferrol ás 10:30 e chega a Ribadeo ás 13:25 e a que sae de Ribadeo ás 14:45 con chegada a Ferrol ás 17:40. Está claro que estas decisións van na dirección de rematar cun medio de transporte fundamental para a vertebración da Comarca, tanto na perspectiva do transporte de viaxeiros, como no plano económico”.

Manuel Parga acusou de xeito directo ao Partido popular desta decisión denunciou que “ estamos diante doutra discriminación máis para a Comarca, posto que mentres noutras zonas do Estado, como Asturias ou Cantabria, refórzanse os servizos de FEVE na Mariña, Ferrolterra e Ortegal suprímense liñas. Neste caso máis unha vez o PP fai todo o contrario do que lle interesa aos veciños da Mariña, xa que do que se trata é de ampliar a oferta de liñas, particularmente no servizo de cercanías, e tamén na súa utilización para o transporte de mercadorías, posto que non debemos esquecer que FEVE atopase nunha situación inmellorábel para dar saída á produción da factoría da Alcoa”.”Non imos permitir que o Goberno do PP desmantele este servizo e a par que comprometemos o noso apoio tanto no plano social como institucional para que o mesmo se manteña demandamos dos representantes na Mariña do PP que estean á altura da situación e antepoñan os intereses da zona as directrices do Partido”, afirmou Parga quen lembrou a iniciativa presentada por el mesmo no Parlamento de Galiza para manter o servizo.

O Parlamentario do BNG, Manuel Parga, demandou “unha resposta unánime do conxunto dos axentes sociais e políticos da Mariña para manter o ferrocarril e esixiu responsabilidade e altura de miras do resto das forzas políticas, sacando o tema do debate partidista, a fin de obrigarlle ao Estado a modificar esta proposta. A nosa vontade é concordar con todos para que A Mariña, tamén neste tema non de un salto atrás de 50 anos, posto que unha vez fechado o servizo, recuperalo vai ser particularmente complicado”. Neste sentido Parga fixo un chamamento ao conxunto das persoas reunidas na Estación de Ferrocarril de Burela. “Temos que seguir mobilizándonos na defensa dunhas infraestruturas que son básicas para o desenvolvemento económico e a vertebración territorial da Mariña” afirmou Parga quen se dirixiu a dirección de FEVE que se xunta mañá en Ferrol para tomar unha decisión definitiva sobre a liña “esixíndolle a quen non actúen como xordos diante das demandas cidadáns, posto que a política xenocida do PP diante a comarca sempre estará enfronte o BNG para defender os seus intereses”.

“Non nos merecemos un goberno que nos marxina e que ten perfectamente deseñado un Plano para acabar na zona “ afirmou Parga diante dos concentrados que coreaban a consigna de “Salvemos o tren” ao mesmo tempo que lamentou “ o silencio ou en todo caso a inación dos populares ao respecto. Onde están os parlamentarios do PP diante do problema ou os seus cargos orgánicos”, preguntouse Parga , quen fixo pública a súa opinión que “non é casual que sexa a nosa Comarca unha das que lle toca levarse a peor parte nas decisións políticas do Goberno Feijoo e senón pensemos na sanidade, na educación, na posición da Xunta sobre Alcoa, ou nos niveis de desemprego. So hai unha explicación que o PP de Lugo non ten peso na Xunta e que os dirixentes mariñaos do mesmo van ao seu sen preocuparse polos problemas da Comarca”. “É tempo de rebelión e loita concluíu” Parga que presentou “ aos nacionalistas como o único dique fronte a unhas políticas que condean á Mariña á miseria e ao atraso”