Concello e Comunidade de Montes presentaron denuncia polo roubo e danos causados na área recreativa do Monte Castelo

Burela, 27 de xuño de 2013. A comunidade de montes en man común e o Concello de Burela presentaron denuncia esta mañá diante da Garda Civil tras o roubo e os danos causados na área recreativa do Monte Castelo, segundo manifestou o alcalde.

José María González Barcia dixo que “a denuncia foi presentada polo roubo de pedras de varios bancos da área recreativa do Monte Castelo. A semana pasada detectouse que faltaba a parte superior de varios bancos, presuntamente foron arrincadas con elementos mecánicos e estou completamente seguro de que estarán adornando algunha vivenda ao mellor non moi lonxe de aquí”.O rexedor burelés sinalou que “tamén denunciamos o roubo de elementos da zona de xogos que está ao lado do edificio do bar da devandita área recreativa”.

O alcalde explicou que “o que roubaron foron tres pedras de grandes dimensións, ademais os tres bancos quedaron desfeitos. Queremos que a Garda Civil investigue os feitos e a ser posible dar cos responsables dos mesmos, porque entendemos que se está a danar un patrimonio de todos os cidadáns deste concello”.

González Barcia anunciou que “durante este verán incrementaremos a vixianza no Monte Castelo porque se vai proceder á contratación dunha brigada contra incendios formada por cinco persoas, grazas a un convenio asinado coa Xunta de Galicia que terán como labor fundamental, a parte da loita contra os lumes, a de manter a área recreativa do Monte Castelo nunhas condicións óptimas”.

O rexedor de Burela engadiu que “non estamos dispostos a tolerar que desaprensivos poidan roubar elementos deste entorno que teñen un valor considerable. Nós valoramos os danos causados nuns 3.00 euros, que terán que saír dos petos de todos os cidadáns deste concello para poder arranxar eses desperfectos. O que queremos é que, si se procede á localización e identificación das persoas que cometeron este roubo, paguen e que nos resarzan dun dano que é importante”.