Portos de Galicia remata a dragaxe da canle de acceso á dársena do Porto de Foz

Santiago, 20 de xullo de 2013.- Portos de Galicia vén de rematar as obras de dragaxe da canle de acceso á dársena de Foz, unha actuación demandada polo conxunto da comunidade portuaria. O presidente do ente público, José Juan Durán, visitou a zona, na que se incrementou o calado dos fondos mariños e da que se extraeron 6.000 metros cúbicos máis dos previstos sen incrementar o custo inicial.

A actuación consistiu na extracción de 31.000 metros cúbicos de area do fondo da dársena, de xeito que se incrementou o seu calado, mellorando a operatividade do peirao. O orzamento dos traballos foi de 236.999 euros e o prazo de execución previsto pola empresa, que era de cinco meses, reduciuse a pouco máis dun mes.

A caracterización dos sedimentos realizada na tramitación previa da obra revelou que se trataba de areas medias limpas, con escasos finos e materia orgánica, que será depositada na zona de Areosa, tal como se consensuou co Concello e a comunidade portuaria. A elección deste punto de vertido da area motivou a dilatación da tramitación das obras, dado que tanto o sector profesional como o da náutica recreativa solicitaron a Portos que se estudiase outra alternativa, que finalmente non resultou viable. Portos de Galicia aceptou realizar esta avaliación, asumindo o retraso nos traballos, en aras do consenso cos usuarios do porto.

Cómpre lembrar, ademais, que no ámbito da dragaxe conflúen tres catalogacións ambientais: Rede Natura, Lugar de Interés Comunitario (LIC) e Zona de Especial Protección Ambiental (ZEPA) o que obligou ao ente público a desenvolver unha escrupulosa tramitación ambiental previa, de xeito que se obtiveron plenas garantías de conservación do entorno.

Esta dragaxe de Foz súmase á realizada hai dous anos, así como ás actuacións de mellora da seguridade portuaria e do ordenamento do solo que Portos de Galicia vén de executar tamén no municipio, cun investimento global de máis de 700.000 euros.