Sánchez Presedo rechaza o acordo pesqueiro con mauritania porque “sacrifica inxustamente á flota cefalopodeira galega”

O eurodeputado socialista e membro da comisión de Pesca do Parlamento Europeo, Antolín Sánchez Presedo, lamentou o voto favorable da Eurocámara ao Acordo Pesqueiro entre a UE e Mauritania, e instou ás autoridades comunitarias a “traballar desde hoxe mesmo por un novo Protocolo distinto e satisfactorio”.

Trala votación, o eurodeputado socialista enumerou os problemas que presenta o actual Protocolo e que foron o motivo do seu rexeitamento. En primeiro lugar, as restritivas condicións económicas e técnicas; y, en segundo lugar, a expulsión da flota cefalopodeira europea de augas mauritanas, “con gran impacto en Galicia e Canarias”, sinalou.

Así mesmo, lamentou que durante os últimos meses de negociacións non se corrixiran os “enormes desequilibrios” sen os cales, -engadiu- “o acordo non é aceptable”.

A este respeto, censurou que o Protocolo sacrifique inxustamente á flota cefalopodeira galega, e advertiu do traumático impacto económico e social para Galicia, “xa que se obrigou a amarrar numerosos buques que, inxustamente, perderon toda oportunidade de faenar na zona”.

Sánchez Presedo cualificou, tanto o Acordo como as condiciones nas que se negociou de “pouco transparentes, desproporcionadas e lesivas”. “A flota europea representa apenas o 6% das capturas de polbo e non compite coa flota artesanal mauritana”, explicou. Igualmente denunciou o trato inxusto aos barcos europeos, “pese á súa expulsión, outras flotas industriais continúan faenando, a porcentaxe de capturas accesorias de cefalópodos aumenta e tamén o fan as importacións procedentes de aguas mauritanas”.

Na súa opinión, “son moitas as razóns que o actual Protocolo non é beneficioso nin para a UE nin para Mauritania, xa que afasta as relacións pesqueiras con Mauritania da senda da sostibilidade”.