Mario Outeiro denuncia a discriminación que están a sufrir os profesores do CELGA por parte da Xunta

Lugo, 9 de maio de 2014. O delegado de Cultura e Turismo e portavoz do BNG na Deputación de Lugo, Mario Outeiro, denunciou, na rolda de prensa posterior á Xunta de Goberno da institución provincial, a discriminación que están a sufrir os profesores encargados de impartir, até o de agora, os cursos do CELGA, por parte da Secretaría Xeral de Política Lingüística, unha situación á que Outeiro se referiu como “un novo ataque da Xunta de Galiza ao noso idioma, o galego”.

Neste sentido, o deputado provincial explicou que “o pasado mes de xaneiro publicouse a listaxe provisional de profesorado colaborador para impartir os cursos do CELGA como se viña facendo durante os últimos trinta anos. Un profesorado que, durante todo ese tempo, estivo traballando nunhas condicións precarias, sen contrato, sen seguridade social nin dereitos básicos laborais”.

Tras unha denuncia realizada polas traballadoras e traballadores afectados por esta situación, a Inspección de Traballo deulles a razón e, ademais da sanción correspondente á Xunta de Galiza, deu de alta de oficio a este profesorado na Seguridade Social con carácter retroactivo do tempo traballado nos últimos catro anos.

“Ante esta situación, a reacción da Secretaría Xeral de Política Lingüística non se fixo esperar, e non se saíu das súas liñas de actuación habituais a día de hoxe: un novo recorte no profesorado e un novo ataque á lingua galega. Un novo recorte porque despediu aos que eles denominan “profesorado colaborador” para fomentar o pluriemprego ofrecéndolles impartir os cursos de galego a profesores de secundaria como horas extras, e un novo ataque ao galego porque moitos deses profesores non son licenciados en filoloxía galega, un dos requisitos indispensábeis para impartir cursos do CELGA” – precisou Outeiro.

O delegado concluíu a súa intervención lembrando que “estamos ante un novo paso da Xunta de Galiza no seu camiño de pisotear os dereitos da lingua galega e os dereitos básicos da clase traballadora, así como de destruír empregos sen máis miramentos, algo que leva facendo desde a chegada do Partido Popular a esta institución”.